韓國後記及行程

返呢香港第二天已經要返工，大家見到我，都用一個字形容我，就係「瘦」，大家都驚訝我食左咁多野，點解都會瘦? 我想講，我係食左好多唔同類型既野，但我不是吃放題，所以有時都係好夠飽；再者，我在韓國幾乎日日都係追、趕、搭車，而加上好多地鐵站都冇電梯，成日都要跑樓梯，運動量係香港半年既總和，咁樣攪好難唔瘦。

雖然辛苦，兩星期的旅程亦相當順利完成，想去的地方，亦都有八九成去得晒，所以做功課真係好緊要! 行程最深刻的可算是板門店與北韓的相遇，最後一天落住雨睇楓葉，美麗的釜山甘川洞同埋首爾的惠化壁畫，同埋鷺梁津食左兩隻巨蟹，我仲要讚賞一下韓國的食物，味雖然濃，但係食完唔口渴，好顯然就係冇味精，這點抵讚，使喉嚨及胃部得到休息。

韓國會是我少數覺得「仲有下次」的地方，去完之後，我已經開始構思再來韓國的行程，例如去返今次錯過左既慶州，自行到臨津閣前往都羅山同第三隧道，仲有睇櫻花、雪嶽山等等……不過下次唔駛去咁耐，比多一個星期我就OK!

今次去韓國，試了一個很特別的體驗，就係首幾天的家庭住宿，其實在韓國(二)都係講過點申請，而家就讓我比較一下使用家庭住宿同一般旅舍的特點︰

一般旅舍	家庭住宿
優點 -   通常位於市中心/地鐵站附近，能夠自行尋找 -   豐儉由人，平有平住，貴有貴住 -   沒有回家時間的限制，鍾意幾時返hostel就返hostel -   可以認識到其他遊客	優點 -   住的質素較高，好似返屋企既感覺 -   可以與屋主文化交流，或一起吃飯，感受當地人的生活 -   屋主需要透過認証才能提供遊客的住宿服務，他們的服務都很好 -   私人空間能得到確保
缺點 -   住的質素冇保証 -   如果唔識搵路冇人接你	缺點︰ -   住址不一定就近市區/地鐵站，開頭未必咁容易找到 -   始終和別人的家庭一起住，也不想太夜返，以免打擾人家 -   未必能夠識到其他人

但先旨聲明，以上的比較可能會片面，因為始終我沒有光顧過所有家庭住宿同旅舍，所以只係就一、兩次的經驗來作比較；不過如果下次真係再去韓國的話，我會再考慮家庭住宿，事關住得真係比較舒服。

完成韓國之旅，我的下一站又會在那裡呢? 其實仲係一堆地方排住隊，但最想還是趁「後生」，去外地做義工，所以2013年的目標，我可能會試下搵一D海外工作營，希望到時有更豐富的分享面世! 暫別!

另外，放埋韓國之旅的行程撮要︰

日期	行程	住宿
14/10 Day1	-   夜晚七點幾到達首爾，花了兩小時才找到家庭住宿的地方	家庭住宿
15/10 Day 2	上午︰明洞 Lunch︰神仙雪濃湯 下午︰弘大Trick Eyes Museum     明洞Nanta Show Dinner︰豬腳@南大門	家庭住宿
16/10 Day 3	全日︰板門店Tour Dinner︰部隊鍋@東大門 晚上︰首爾塔及Teddy Bear Musem	家庭住宿
17/10 Day 4	上午︰青瓦台 Lunch︰土俗村人蔘雞 下午︰景福宮      貞洞劇場 Dinner︰家庭住宿燒烤	家庭住宿
18/10 Day 5	全日︰巴士到釜山 Dinner︰札嘎其魚市場 晚上︰龍頭山公園	Blue Backpackers@釜山
19/10 Day 6	上午︰巴士到順天 下午︰順天灣公園 晚上︰巴士回釜山	Blue Backpackers@釜山
20/10 Day 7	上午︰買巴士票 Lunch︰生魚片定食餐@西面 下午︰甘川洞文化村      釜山塔 Dinner︰吉列豬扒@釜山大學區 晚上︰PIFF廣場	Blue Backpackers@釜山
21/10 Day 8	上午︰巴士至安東 下午︰安東河回民俗村 晚上︰巴士回釜山	Blue Backpackers@釜山
22/10 Day 9	上午︰check out、寄明信片 Lunch︰牛肉蓋飯@釜山站 下午︰太宗台      買手信@札嘎其 晚上︰KTX回首爾	Hostel Korea@首爾新設洞
23/10 Day 10	上午︰水原華城 Lunch︰淵瀑牛排 下午︰華城行宮 Dinner︰海鮮餐@鷺梁津魚市場 晚上︰樂天超市	Hostel Korea@首爾新設洞
24/10 Day 11	上午︰昌德宮     昌慶宮     昌德宮秘苑 Lunch︰粥@安國站附近 下午︰韓屋村+明洞 Dinner︰雜菜鍋@仁寺洞 晚上︰JUMP show@鐘路三街	Hostel Korea@首爾新設洞
25/10 Day 12	上午︰火車至加平 Lunch︰炒「辣」雞@南怡島碼頭 下午︰南怡島     樂天免稅店     清溪川 Dinner︰韓式燒烤@東大門	Hostel Korea@首爾新設洞
26/10 Day 13	上午︰惠化壁畫村 下午︰KTX至井邑 晚上︰井邑焗Sauna	Motel@井邑
27/10 Day 14	上午︰內藏山 下午︰KTX回首爾 Dinner︰陳玉華一隻雞 晚上︰樂天免稅店	Hostel Korea@首爾新設洞
28/10 Day 15	上午︰坐飛機回港	N/A

韓國(十四)︰楓雨同路

10月27日

上午時份打算早點醒來，拿拿臨到內藏山匆匆一瞥，誰知有不詳預感，因望落地下，見到地下都濕晒，唔通又落雨???? 點解每次都係我留在那個地方的最後一天，就會有大雨來歡送我? 於是下到地下，發現這不是預感，而是事實，我沒有帶雨具，只是利用風褸的頭蓋笠住個頭當擔遮，希望能夠捱到今日。

走出街上都是「陰陰濕濕」，行返去KTX方向，已找到171去內藏山的巴士站，而且見到有架171已經耐心等候乘客，一車都係穿著行山裝束的遊客，其中大部分是老人家，等左一陣，巴士就出發往內藏山，車程大約是30-40分鐘左右，非常方便，到步的時間大約已經九點多。

仲以為可以避過人潮，結果都係失敗，一落車人流就熙來攘往，落車後有一段小插曲，部相機用到冇晒電，本來一直都有帶後備電池，但係唔知點解搵極都搵唔到，攪左十分鐘，本來用後備相機，但連後備相機都冇電，最後唔知點解突然摸得返個電池，真係嚇死，時間已經極之緊迫，冇可能再返motel拎，又冇可能唔影相，好彩終於搵返，唔係真係唔知點算!!

一路跟住人潮，一步又一步，越入越紅，不知不覺，便入了楓紅隧道，終於不再感覺欺場，縱使都不是想像中般紅遍全城，但最少一路上楓葉都能隨處可見，也算滿足，問題是天氣相當差，濕濕寒寒，渾身不舒服，開始時雨還不算太大，但越接近登山纜車站，雨勢越大，我仍然只得一件風褸遮頭。



開始步入楓紅隧道





滿地紅

懷舊mode



羽化亭

大約走了一個鐘，就看了一條人龍，看來要上山都難逃一排，心裡頗為焦急，擔心行唔晒，好彩只係排左20分鐘左右就可以上纜車，上到另一邊山，就是內藏寺及瞭望台的所在地，我跟隨人潮，在濕滑的石路上步步為營，才走到瞭望台，瞭望台附近有條路落去內藏寺，我在猶豫，到底仲落唔落埋去，還是上左瞭望台再決定。

經再三考慮後，由於時間已不早，大約11:45，為免趕不及時間，再者天雨路滑，費時行行下跣落山崖，忍痛捨棄落去內藏寺，再者頭先已用望遠鏡「近距離」望過內藏寺，那邊看來未算楓葉盛放，所以不值一搏。所以決定落山走人，豈料一落山，雨勢變得相當大，但我看見一些紀念品的攤檔有風鈴賣，所以速速買下，由原價W7000講價到W5000，哈哈，我是不會因為落雨而唔講價的。

 一路回程，雨勢沒有停止跡象，我慶幸之前已影了不少相，而家落雨都唔驚，只是對鞋再一次盡濕，腳又再一次浸水，所以我相信它經已完成歷史任務，陪我返香港之後就要退役。終

於行返去巴士站喇! 好快就有車，大約一時左右就返到井邑。

這個就是內藏寺，可惜今次無緣前去

清楚可見的楓紅隧道

從瞭望台回程中，有小路可上到這個叫「文筆台」的地方，這是當時的僧侶靜修的地方



下山了，羽化亭的另一角度

雨勢仍沒有停，但我得趕快找東西吃，一直在這裡看到一間「中華樓」的餐廳，突然口痕，想食返D「中國野」，而且唔知點解開門既舖頭唔多，呢間係其中一間有人幫襯的地方；我求其點了個炒飯食，點知有驚喜。

我就係去左呢間太平樓食lunch

炒飯相當足料，唔會係飯多個餸O個隻；右上角兜黑色野唔知係湯/醬，總之好重口味，食左幾啖就放棄，還是紅色那碗辣湯好味D!

飯就食完，雨仍未停，所以決定狂奔返motel，拿拿臨拎埋行李就趕快跑回KTX坐車，今日真係濕左成幾粒鐘，幾經辛苦，大約兩點半就上了KTX回首爾，1648便回到龍山站。今晚是留在韓國的最後一晚，所以和朋友食埋最後一餐 – 陳玉華一隻雞，我直接前往東大門站(421)九號出口等，等的時候雨勢未止，我的鞋已變成小水塘，超辛苦……

再別井邑

今次我早到了一點，看到了真正的「東大門」，等了一會朋友就來了，我們就冒雨搵路，沿途問下人，好快就見到排隊食雞的人龍，我們大約等左廿分鐘就有得入去，不過只可以揀坐地下，真是一億個唔願意! 事關隻腳太濕! 可惜太肚餓，冇得選擇。其實基本上唔駛落order，個個呢到都食雞，差在係幾多人份量。

食完中段，覺得真係唔係幾夠食，再order左麵條，但都唔係好夠，我停手喇! 有七成飽就算數，唔係都唔知食到幾點，因為我要在八點前趕往樂天超市買手信，而時間亦已到了七時十五分。這晚是和朋友最後一晚在首爾見面，就在廣藏市場分手了，而我就跑去地鐵站；時間大約七時五十分，由於我以為免稅店同樣是八點關門，我選擇先去免稅店，結果原來免稅店九時才關門，結果趕不到返落去樂天超市了! 點解到最後一日都係會趕唔切去想去既地方??? 無計，惟有疊埋心水在免稅店完成買手信的任務，包括蔘片、朱古力、小紀念品等，買到九點鐘，剛好收工，滿載而歸。BTW，我用左US53買一大盒蔘片，唔知算唔算平呢?

最後一站，就係打算返明洞，打算將餘下大部分的韓圜，換返港幣，因為我驚返香港換會換得少，其實我真係唔係好識計，時間已經晏，開門的找換店已經很少，幾經辛苦找到一個上樓的找換店，$400港幣要用W67000換，看來好似唔化算，不過算吧! 下次都唔知幾時會再來。換完錢之後，我買埋最後一樣手信-泡菜，呢樣最蝦人買，因為會發臭，我在超級市場，終於看到一罐罐的泡菜，這是最理想的size，因為免稅店的都是一大包買，我亦知道冇人會食咁多，所以這個size最好，順便買多少少香蕉奶，始終返到香港未必咁容易再飲到。回到新設洞，我把首爾咭的餘款退回，不過係冇任何機器可以做到，必須要人手處理，我被人帶到地鐵站一間隠蔽的房間，由職員親自幫我攪，結果拎返W500，雖然真係好少錢，但係我拎返出來，我最少都可以捐左佢，儲埋落張咭返香港就一定無用。

告別辛苦的一天，不過都要確定返機場的巴士站位置，原來一出大街就搵到，相當方便，我發覺自己還有些碎錢，就在附近的小店買一些小食當早餐，因為明天乘坐早上九點幾的航班，一早就要起身，無時間再買任何東西。

搭左咁多次地鐵，先至知道原來韓國地鐵咁先進，我地可以睇住螢幕上的小火車，便能知道下一架車幾時來

雨中東大門

夜闖陳玉華一隻雞

隻雞實在太細隻，但好滑

好多人話食呢度既雞，重點在於這些秘製辣醬，將呢三支野撈埋一齊，就會成為好正既汁

其實唔辣架，真係一隻好正既汁

10月28日

昨天連綿不斷的大雨，竟然未有為今天帶來寒冷的天氣，不過最好的還是早上已沒有下雨，終於打破要離開的一天必定落大雨的詛咒(因為之前鑊鑊都係咁)…..

不知是否星期日的關係，返機場的巴士班次疏落，心裡有些徬徨，最終等了大約25分鐘先有車，攪到好趕，好彩車程都算快，我計過，剛剛好用了70分鐘便到機場，距離要登機入閘仲有一個鐘頭多少少，在排隊辦登機手續期間，有位韓國官方旅遊大使邀請我幫她做問卷，我說做完登機手續先幫佢，我咁講係諗住「耍」走佢，事關時間真係幾趕，誰知辦完登機手續，姐姐真係坐O係度等我，既然係咁，我就以極速時間幫她完成問卷，問卷中問到我去過那些景點，嘩，數下數下，我都去左佢個list的三成，仲有一些佢個list沒有的景點，就像是為我的韓國之旅做一個小回顧咁；哈，真係好人有好報，做完問卷竟有一盒精美的筆贈送，可以多一份手信喇!!

最終我也能準時登機，好了! 韓國之旅也正式到此為止。去完韓國，當然都仲有些少感受啦! 不過都係抖下先慢慢寫

旅遊心得︰
1. 171巴士站好近KTX站，好易搵

2. 臨離開首爾前，記得把T-money或遊客咭的餘額退回，但係遊客咭係無得refund，只能留為紀念了! 


是日重要消費︰

內藏山171巴士單程	W1300
內藏山入場費	W3000
內藏山登山纜車來回	W7000
陳玉華一隻雞 (3人)	W21000
機場巴士	W10000