我愛上了台灣

一直對這個地方念念不忘，究竟台灣有什麼魔力呢? 不過很難用完整的段落講出來，還是諗到咩就寫咩︰


- 喜歡台灣有博愛座，又喜歡台灣人很有意識地不會坐在博愛座上


- 鍾意台灣到處都係繁體字，有親切感


- 鍾意台灣冇D好老土的翻譯


- 鍾意台灣既空氣污染有大大的改善


- 鍾意台灣唔大又唔細


- 鍾意太陽餅，唔甜又唔淡，O岩o岩好   

- 墾丁的天色、海色、沙色，仲有吹完覺得舒服既海風


- 台灣太方便，出入都可以搭地鐵


- 口味和香港相近，魚生、燒魷魚又比香港平


- 民風淳樸，的士唔呃人


- 出入唔駛提心吊膽，擔心治安問題


- 搭飛機好快，個半鐘就到，猶如做一個家訪既時間


- 有心思，連一個便當都好別緻，而且仲好環保


所以，去台灣其實仲有下次，不過應該去下d未去過，例如阿里山、花蓮、宜蘭，而且我發覺台灣有很多神秘但特別既地方，例如什麼十份、鶯歌，真係值得回味。在回程的時候，我在想...如果當年我真係有去台灣讀書，我會否過得很開心呢? haha


不過外國的月亮總是比較圓。

台灣(五)︰高雄快閃之旅

四天高速的上車落車的行程即將完結，今朝去埋剩返既一些墾丁地方，然後中午就會去高雄的旗津作短暫停留，最後就會返高雄搭8:30飛機走喇!

今早一起床，咀唇已回復正常，椰青的滋潤程度不容忽視!

臨離開民宿前，當然要幫民宿的門口做個紀念啦!

然後我們就去青蛙石公園，這隻青蛙石認真詭異，本來諗住有條路落去，舊石應該訓o係個海度，誰知行左三個字，都搵唔到一舊似青蛙石的物體，因為個牌顯示既青蛙石應該係咁既樣                        

o係海邊行行下，落住微雨，於是放棄再尋找，誰知原來根本唔駛落去搵，原來青蛙石係o係山上面，building後面就係青蛙石

可能要搵一個o岩既角度睇先至似，無論如何，已經冇咩時間，就此作罷，我們幾個異口同聲都話呢個景點︰「搵笨」

下一站就去一個類似香港郊野公園的遊客中心，最impressed係呢個行程表

遊客中心唔算多野睇，主要都係介紹恆春的歷史、墾丁的生態等等，雖然唔打算玩水上活動，不過都落去南灣到睇下               

之後去埋瓊麻展示館，不過而家瓊麻的需求很低，所以冇人種，變成展館被人參觀，瓊麻係以前恆春的經濟支柱，主要用作整麻繩、繩網等東西

時間尚早，亦表示除左牧場之外，墾丁可以去的，我地都去晒，我們本來想到附近食海鮮，但小簡唔建議，而且我地屬意o個間舖頭仲未開門，於是改變策略，早點返高雄，在沿路找東西吃。不過有些失望，因為一心諗住有得食生魚片。

小簡在返高雄途中，帶我們買了一些手信，又買左雪條比我地食。然後我們就到這裡「小杜包子」，各人買了些大包上車，我買左辣既獅子頭飽，雖然係辣，但係味道唔錯，熱騰騰才好吃。

沿路我們找到了一個臨海的小餐館，買了個100台幣的雞比飯小便當，台灣的便當的設計，份外別緻。

吃過午飯後，啟程回高雄了；大約下午一點幾，我們到達高雄，小簡車我地去機場，先放下行李，高雄的機場好鬼細，一眼睇晒就係得咁多地方                     

小簡雖原藉高雄，但他表示他不懂得搭公車，因為他們不是坐摩托，就是自己有車，所以離開機場後，我們想搭巴士去旗津，他竟然搵呢搵去都唔知個站o係邊，最後終於搵到，不過係一個工業區的地方，走進便利店拍完照後，小簡就告別我們了。

我們就在狹窄的車站中，等候疏落的35號巴士去旗津。

等左大約20分鐘，終於有車到了，巴士上果然好少乘客，我們去旗津，其中一個原因是為了這個風車公園。

天氣雖然有點酷熱，但海風吹來，又真的有點消暑的感覺，在香港的海旁，根本無可能感受這些清新的海風，不過風車就有些失望，唔靚之餘仲覺得有D核突。之後我們再沿海旁行了一會，再搭返35號，去旗津碼頭。但去旗津碼頭是有些錯誤，因為我一直以為旗津漁港就o係碼頭附近，誰知根本兩個地方，幸好明查暗訪之下，才知道旗津碼頭附近都有食生魚片的地方，先至無咁失望，事關體力到今日已嚴重下降，已經邊度都唔太想去。

旗津碼頭                                                

從碼頭望向高雄對岸                                

旗津市中心                                     

我們隨意在街上找了一家海產店，由於實在太期待生魚片，所以急不及待坐低。台灣的生魚片，其實就係魚生。

除左厚切之外，吞拿魚同另一種魚都幾好食，三文魚就唔算特別香。但我實在太喜愛魚生，所以叫左兩碟，呢度一碟，要成120台幣，我諗香港就算有咁平都唔會有咁大碟啦，除此之外，我們還叫了一客炒帶子                                            

吃飽了，時間已經差不多，想6:30前就返到機場，食完生魚片，就行返碼頭，坐返船去高雄了。 這裡已經回到高雄了，後面好似豪宅/富豪區咁樣

旅程中最後一個難題來了，就是該如何由鼓山碼頭返去捷運站搭返機場，由於唔知西子灣不等於西子灣捷運站，於是問人西子灣，途人都好驚訝咁話比我地知西子灣好遠WOR，仲要行錯左，走左去橋的對岸，最後我地覺得有些唔對路，再問人先知行錯路，由於冇高雄地圖，於是路在口邊，其實個捷運站都唔太難搵，最後我們終於找到西子灣站了。

我們順利於6:30左右回到高雄機場，靜待8:30的航機回港，這刻身體雖然疲憊，不過上到飛機又唔捨得訓，因為原來d節目都幾好睇。我們就順利回到香港，但唔知係咪太冇精神的關係，部相機竟然跌左出來，好彩比友人發現，不然這些blog便無法面世。

我會更愛惜我部相機，錫多佢幾啖先.....

由於我有生日優惠，坐機場快線有半價，於是選擇坐機場快線回家。

唔知點解，係一路坐地鐵回家既時候，一直諗住台灣。本來我一直都覺得台灣只係一個普普通通既地方，之前幾次去完都冇咩會懷念既感覺，所以亦都唔期望今次會有咩特別，但係竟然我掛住佢?? 死喇，我諗我「乃」左野，就係....

我愛上了台灣...

我鍾意左佢d咩，留待下文分解......

台灣(四)︰深入墾丁

今日係包車最豐富的一日，幾乎行盡了墾丁的影相位了。不過我自己唔係每一個點都有影相，因為有些我覺得確實比較無聊，還是揀一些特別的來記住吧。

出發前，我們先品嚐旅舍的家庭式早餐。新鮮的煎蛋火腿三文治，還有淡淡的豆漿，雖然簡單，卻美味，不過我們見到鄰座的小朋友有另外一set的早餐，不是以三文治做底的，似乎更加吸引，打算聽日叫兒童餐食下。      

吃完早餐，司機遲了一點才到，第一站我們便先趕往酷似尼克遜的「船帆石」

之後進入砂島貝殼展示館，這裡的沙都是由貝殼造成，不過要用顯微鏡才知道是貝殼/珊瑚，否則同一般的沙無異          

鵝鑾鼻燈塔，但原來未到「國境之南」         

鵝鑾鼻公園一景，吹著陣陣海風，如果唔係個口爆拆的話，都幾舒服   

要到台灣最南點，在鵝鑾鼻公園之後，司機再駛前一點，行過這條林蔭之路十分鐘左右，才真正到了台灣最南點    

所謂最南點，其實就只有一塊大石碑       

應該是晚上看星的好地方，但日頭來便荒地一片的龍磐公園  

之後就邁向「佳樂水」，途中經過一些特別的民宿，友人下車拍了一會照，但我興趣不大，之後也經過「風吹沙」，也經過「港口吊橋」，終於用了80台幣進入了「佳樂水」

「佳樂水」是墾丁的野柳，但規模當然少得多，我們乘坐相片左邊的VAN遊區看怪石，歷時約半小時                          

這是處女石，嘩.......      

青蛙石                                            

山豬頭                                                                 

不知名石，但其實加點想像力的話，這也是一種動物         

已擱淺了很久的船                                         

看遍大自然的精心製造的雕塑後，時值中午，是時候去吃飯了。我們去了恆春古城吃飯，途中經過滿州花海，但似乎花期遲了，園裡只是初熟的波斯菊，可觀性不大，之後經過東門，便進入恆春古城的山東餃子店醫肚。食飯途中，看見這座「孤塔」，原來是用作搶包山之用。        

由左而右︰紅燒肉、炸醬麵、豬肚酸菜湯，下面當然是鍋貼，之前還來了海鮮炒河

飽就飽，不過沒特別，同埋很多豬肚，我個人不喜歡。由於我表示口渴，司機帶我們去附近的一間店舖，吃綠豆饌，其實就是綠豆沙冰，60元台幣一杯，的確消暑

寧靜的恆春古城                      

解完渴後，我們前往另一海角七號的景點 - 阿嘉的家

阿嘉的家特別是處是這裡有一個懂得幫人拍照的蒙古症女孩，門口貼著的就是有關這個女孩的採訪，不過由於要錢，所以冇見識過個女仔點樣識幫人影相 

在阿嘉的家門前，有個賣椰青的檔口，小簡見我咀唇勁爆拆，就叫我飲個椰青，那我就姑且一試，試完之後，我們便到下一站 - 紅柴灣玩潛艇，途中經過雄偉的恆春古城北門，那麼當然影個靚相先

轉眼間就到了紅柴灣，坐海豚號潛艇300台幣一位，所謂潛艇，表面其實都係一隻普通船，只是船比較深，會有個玻璃窗，用來望著水底的情況。

未知是否時間的問題，下午的海底水靜河飛，同平時自己養金魚個金魚缸差唔多，睇左一陣，已覺得自己睇緊「漁樂無窮」。唯一覺得特別的，是發覺水底好似有許多高山，就好似我搭緊飛機，從天空望落地下見到好多山谷的感覺一樣。令我想到，原來可能我們身處的環境，可能以前都係被水浸住，成為一個海洋的世界。神的創造認真唔講得笑。不過真係冇咩好睇.......   

下一站，去左貓鼻頭公園，唔知係咪睇左太多石既關係，開始覺得舊舊都差唔多，睇得有d求其，老實說，我唔係好feel佢有幾「貓鼻」

唔知叫咩灣，不過呢度睇到核電廠的物體       

其後，我們到了關山看墾丁的景色、福靈龜，不過都無影相，因為都係好似舊舊都差唔多咁，然後又再看日落，不過我誠然覺得在漁人碼頭同尋日o個度靚D，所以都係唔重覆。日落後，我們開始購買玩「出火」的煙花物資，小簡帶我們到恆春古城的一間店舖，用了大約470台幣，購買3人的煙花物資。

入夜後，立即前往恆春出火區，其實出火就係有天然的地熱火一年三百六十五日唔熄滅在地上出現，所以拎住d煙花直接點就得；由於好少玩煙花，玩既時候都幾驚下，仲將點煙花既香「乃手」掉左，好彩仲有一支香做後備。不同既煙花有唔同既玩法，有d就用來畫字，不過由於驚，所以唔係畫得好成功，同埋最主要是喪用煙花mode影相影到我地幾個既相機都冇晒電，結果影到中途就全部都影唔到，呢兩張叫做影得比較成功同似            

無論如何，只要試過就已經足夠，肚亦都開始餓，燒晒d煙花後，亦都完結了今日的行程，我們請司機車我地返墾丁大街，便在墾丁大街醫肚。我們找到迪迪小吃(南洋菜)，其實就好似o係香港食泰國野既食法。我們點了蝦仁炒菜、唔知咩媽咪炒河、咖哩海鮮同咖哩雞               

醫完肚後，我們繼續在墾丁大街閒逛買手信，臨走前，還買了一份燒山豬肉試下，都幾好食喎，山豬好似冇普通豬咁肥，D肥膏都比較結實

由第一次去台灣開始，已經深深愛上了這裡的木瓜鮮奶，今次冇理由唔買返支? 而且好抵，一包500ML左右                          

飲完之後，睇左一陣講慈禧既港產片就倒頭大睡，今晚訓得極好，我覺得民宿舒服過台北住東龍。