這部分對我來說可以說的不多，因為平時我在香港著的在伊朗都冇咩分別，做男人真方便。不過女人就麻煩得多，伊朗嚴格規定女人一定要戴頭巾，否則應會被視為下賤、開放、無恥，而男人好似話唔可以著短褲。不過事實上在伊朗，除了小孩，基本上冇一個人會著短褲，男人always都係恤衫西褲，也沒有見到穿著街坊裝的人。
2. 錢
一到伊朗便很容易做百萬富翁，事關港幣十元，已等於伊朗幣13,000 Rial，之前睇過好多人話一換錢便要一疊一疊地數，一次換成幾十張銀紙，不過我覺得情況唔算太嚴重，可能我都是在大城市裡兌換，銀紙的面額都比較大，通常都會用50,000Rial來換。
這些都是常用的紙幣，其實尚有5000元紙幣的，不過影的時候剛剛用晒
找來兩張在伊朗見過的最大/最細面額的紙幣，這IR500,000是在伊斯法罕的找換店換的，咁耐以來淨係見過一張，相當珍貴
匯率方面，我覺得伊斯法罕的找換店最好，最差係設拉子。不過我都好小心，唔會一次過換晒咁多錢。
出發前我帶備左個信封係明智的決定，因為一野起碼會換廿幾三十張紙幣返呢，冇可能全部袋晒o係銀包。
3. 認字
早已預料到伊朗有許多地方都是外星文字，卻反而很多地方都見到英文，但偏偏數字卻不賣遊客的帳，堅持以正宗阿拉伯的真身示人，幸好帶了台灣Peiyu的那本書，可以很方便地翻譯到究竟d數字講緊咩，不過身懷計數機有時仲快，伊朗人其實都識睇正常數字的，只是街上幾乎有數字的地方都係符號。
這裡是德黑蘭的一間快餐店，價錢牌就係咁樣喇! 不過讀法係正常既由左至右，同伊朗文字好像有些不同
所以，我建議讀熟一下這些符號才去伊朗，必能事半功倍!
4. 交通
德黑蘭是全國唯一有地鐵的地方，在外地我幾鍾意坐地鐵，事關明碼實價，唔貴又方便，德黑蘭的地鐵有英文地名，只要留心一點，找到自己要落車的站一點都唔難。設備當然比較原始，唔好期望有八達通呢回事，所有門票都係自己去counter買，入閘時用票入閘，出閘用同一張票好似八達通咁掃一掃就可以出閘，仲可以keep住張飛留念。不過唔係特別靚，無咩收藏價值。
地鐵車票
車站路線圖，不能盡信的，車廂內的那個比較update
原來地鐵真係有女性車卡的，不過仲以為一半半咁多，其實只係佔一卡咁多，相片可見黃色圍欄後面的便是女性車卡，但女人其實全部車卡都可以坐的，佢地可以坐晒100%的車廂，但男人只有95%
女性車廂是有閘欄住的
但係當一冇地鐵之後，出出入入便要靠的士了，其實的士的通行性更大，只要站在街上留意一會，便會發覺幾乎架架車都好似係的士咁，架架車都載住一堆乘客。
好明顯，黃色的車就是的士，但係的士未必有樣睇，因為即使私家車都可以係一架的士，只要個司機肯載的話。
但係坐的士的時候必須小心，的士司機係伊朗最貪心的人，的士上唔會有咪錶，收費幾多就睇要去地方的距離、講價的牙力、是否有其他人一起搭同司機的良心。每一次截的士都是鬥智鬥力的過程，但係如果你是一個慷慨唔計較的人，那麼其實以下的提議對你沒有幫助，而且事實上，比起香港的標準，就算佢地點樣濫收可能唔夠香港坐的士的起標價，只是我不想被當做水魚而已，尊嚴問題。
我的提議︰
1. 有路中心截車比較困難，在路口或廣場會較容易截車
2. 我一定會揀一些有位而且有最少一個乘客坐在車廂的車來坐，因為如果遊客坐晒成架車，佢地就會假設你獨霸的士(Private Taxi)而收貴幾倍車資，所以我一定會坐共乘車(Share Taxi)，這種乘車模式在中東很普遍
3. 耐心等候，總會有車停下來落客的，這個便是最好的機會上車
4. 可以借助LP/地圖，或學一些簡單波斯文，司機對於主要旅遊點都是相當熟悉的。
5. 全部的士都冇冷氣，坐完一輪隨時身水身汗
6. 基本上坐車我都會議價，我試過價錢講到最低IR2000都試過，其實如果係共乘的士，都未試過比過萬(除最後一天外)，一般市內行程IR5000都已經比多左。
7. 每個城市的巴士落車站，必會是昂貴的士司機尋找獵物的地方，所以落車後只要行遠一點才截車，想辦法甩開那堆司機，價錢便會大大下降。
8. 每一次坐車如果係一抽二lung，一定把行李同自己離開車廂先比錢，擺低D錢就走人，因為有D司機隨時會反悔之前的價錢，又或者覺得你比得唔夠，但如果我都拎走左D野，就真係睬佢都傻，佢地都奈我唔何，我是不會縱容那些貪得無厭的衰司機的。而這些情況是不只是一次半次的。
雖然如此，我也見過一些優良的司機，其實十個司機有三、四個都是好人來的。
至於其他交通工具，例如巴士，我在伊朗極少搭，第一語言不通，第二冇位坐，第三交通擠塞，不過真係好平，但我時間寶貴，再無時間和巴士糾纏了。
沒有留言:
張貼留言