南非(十七)︰只遊半「城」

今天跟團去太陽城(Suncity)的公司叫做Footprint Tours，隨手看到旅舍的單張找的，到太陽城要用一整天時間，所以八點幾就要走，今天比原定時間等左40分鐘，但係經過多天的磨練，40分鐘已經覺得好好。J先生還向我誓神劈願話今日會幫我問返所有的詳情，我冷冷的拋下一句︰「I hope so」

首先我坐一間的士，去到一間市區的麥當奴外面再轉van，上車看到白人女導遊，感覺比較穩重可靠，車上有對泰國籍的夫婦(但感覺似父女多些)，他們去彼林斯堡Safari，我則去太陽城，沿途盡見不少美麗的花田。這回需要補充︰太陽城和迷城是不同的，詳情一回揭盅。

我們要坐兩小時的車程才到，我自己一個人落車，因為車要繼續入彼林斯堡，然後我要等一架穿梭火車入太陽城，等車都要等成十幾分鐘。到達後便到達Entertainment Centre找份地圖看一看，其實已經預左入到去咩都係錢，所以唔會玩咁多野，映下相就算。這時才發覺原來要去「迷城皇宮」的話，是要到娛樂中心跟Palace Tour去，好似一個鐘一團，好!! 吃完午飯就去搵團去行下。

午飯再次在Wimpy攪掂，因為勝在多選擇，唔駛點用腦。吃完飯後施施然去問有關tour，誰知捉虫，原來Palace Tour已經被其他group tour book滿晒，直到4月20日才有位，4月20日?? 工都返埋啦!! 我終於明白點解呢團會係R450咁平，原來只係接駁交通費，真係咩都唔包，在南非真係咩都可以發生，今日又一單，但「身經百戰」的我，已經不當是一回事，R450其實係平，換著係間死人旅舍攪，R1000都可能換到遲到不堪、態度欠佳的經歷。但最不高興是旅遊書隻字不提有關的情況!!!

不過想起要是沒有機會上到桌山同去到Robben Island，相信我會更失望。這樣也成功安慰到自己。

於是我就決定用埋自己手上那30元的代幣，睇左一場2:30，就係香港同步放映的「大象阿鈍救世界」，勝左就算幾唔識聽英文都會睇得明，動畫果然係動畫，就係唔駛睇字幕都明佢做咩。無聊的我試圖返到時間橋等地震，結果當然落空，於是就做埋最後一項節目 – 打書釘同買明信片，時間好快就過，準時於六點返到出口，只係等左九分鐘就有人接走我，果然可靠!! 不過最後轉來轉去，都要攪到九點幾至返到去。職員J先生仍未向我交待一切情況，不過太倦，今晚終於有飯食了，好!! 我等!! 這晚發現這裡的人開始有點兒怕我，我真的很大突破，做厭了太易被人蝦港式乖仔了，但真係對呢度既人好d都唔得!!

在這個入口處乘搭火車入太陽城                         

太陽城火車，搭十分鐘就入到娛樂中心         

三十元代幣，剛剛好夠入去睇戲                      

非吸煙賭場，竟無人制止我影相                                 

時間橋上，聞說會地震的                                             

從時間橋上望落衝浪谷，這裡隔一陣就會人造浪攪到d人好興奮

只能遠觀，望門興嘆的迷城皇宮酒店                                 

Wimpy午餐                                                                        

臨走在入口附近見到的民族村                                          

經驗分享︰
1.      這回實在地看到自己預先預備一切的重要，這次是多天跟既團最平的一日。

2.      如果自己去Suncity的話，原來不等於會去埋迷城皇宮，需要到旅遊中心查詢，R60一團，但問題可以full booking，所以真係想去埋迷城的話，建議book團前應查詢清楚會否包括遊覽迷城，以免撲個空。

3.      即或不能入去迷城遊覽，太陽城本身都有很多活動玩，例如去衝浪谷玩水、騎馬、去文化村遊覽、玩鱷魚，當然也有人喜歡賭錢，不過這些活動，還是一班人去玩才好玩。