南非(十八)︰幫襯你是我一生的錯

忍無可忍的一天!!! 再無法容忍這裡的荒謬!

今朝9:00已經起床，始終冇人同我交代一切，直到十一時左右，我們還在糾纏於claim錢的問題，意料中事，只是我不肯罷休，我相信不一定是旅行社的錯，我想迫旅舍認係佢地既錯，不過當然，可是兩邊打「龍通」都唔定。以下為部分交涉過程的recording(真實對話是用英文)︰

J = 職員J                 我 = 我

J︰他們不肯refund那一千蚊，因他們book不到機票，他們要收到VISA才可以

做任何野，所以book唔到他們也沒辦法。

我︰咁即係佢幾時先開始幫我book?

J︰我一收到你VISA(應該是星期四)，就fax了過去，但星期六才發現book唔到

我︰唔係他們一收到就立即幫我book機票嗎?

(J開始緊張，他一緊張就不停抽煙，然後就不停重覆剛才的point，並無回答我的問題，終於我忍無可忍，問了一句)

我︰為何你不告訴我原來有可能會book唔到機票的??

J︰I don’t know……總之機票係逢星期一、三、六先出發，本書有寫喎!! 你可以睇下!

而家大家都唔見左本catalogue，你講咩都得，同埋他們並無提過原來不是保証出發的，仲實牙實齒話星期六我就會走得，一怒之下，唔想同佢地拗住，上網去那間叫做Livingstone Trails睇一睇，人地網頁寫的是天天出發，而且如果我自己上網book的話，對方會先幫我check availability。

我︰為何他們不先幫我check availability先叫我做VISA? (如果一早已經知冇機位，根本我就唔需要做咁多野)

J︰但他們需要VISA才可以幫我book嘛….(九唔搭八)

我︰我知，但是否先有VISA才可以check機位?

J︰Hm…..唔駛既….冇VISA都可以check機位

我︰那麼，為什麼不先幫我check機位才做VISA?

J︰總之他們公司係咁講，佢地叫我叫你做VISA，不過你都駛左幾千蚊，又真係   好ridiculous(意指荒謬，連佢都知荒謬)，不過視乎你啦! 但佢地而家仲未同你book機票，你要去的話就要快點通知我!

我真係唔知應該比咩反應?? 佢未book，我的確可以取消唔去，但亦即係話，咁耐以來，即使收到VISA亦都從來無做過任何野。事到如今，已經嬲都邊到都唔想去，冇錯，真係覺得可惜，我又試圖花好長時間去問航空公司如果改返之前的行程，能否refund返果1000元，答案當然係唔得啦!! 過程中，職員也完全不helpful，成間hostel咁大連南非航空都要我找Lonely Planet同佢搵，自己做錯野要我問才肯借他們office電話比我用，這是什麼的旅舍??? 咁樣攪原來已經兩個鐘頭，時間約為一時，過程中職員J竟然仲去左食飯同唔見人，於是我再問︰

我︰我想問下今日飛去瀑布的航班走左未?

J︰(打電話)oh….原來十二點幾已經飛走了

我︰(寸寸地)那麼不需決定了!

J︰係既….不過明日會有機位(又話一、三、六先有機位，簡直一派胡言)

我︰我不會再花多一千蚊去改機票，我不會再去了!!

J︰那當然啦，不過既然Victoria Fall冇得去，剩返既餘數唔駛再比架喇。不過今日星期一，你都好難搵到咩地方去架喇!! 不過會免左你之後所有既住宿。(仲要講埋d咁不負責任的說話)

免我的住宿，對他們來說只係很少意思，但對我來說已彌補不到我的損失，這時我在憂慮，究竟剩餘的三天兩夜，應該何去何從? 為了想自己剩返既日子特別d，我再次想起了Soweto，因為我知道只有真正在Soweto生活，才會經歷到大部分的南非人的生活，而在眾多的旅遊指南也異口同聲推介一間叫做Lebo’s Soweto Backpackers，所以我知道唔需要太擔心，起碼一定會有地方住。我亦覺得無需要擔心很多人憂慮的治安問題，如果治安的問題真係咁嚴重，間野根本無人會去幫襯，仲唔晨早摺埋? 於是我終於找到旅舍另一端work的電話，立即求救，無論幾夜，漏夜都要走! 電話筒接通一把殷勤的聲線，這位就是Maria，南非的email系統係咪有問題，等左成個鐘頭至收到Maria send比我既野，結果我等不了，她答應我今晚七時便會有車從這裡接我走，無論幾夜幾貴我都會等!!!

臨走前的幾小時，旅舍水靜河飛，我的不安驅使我再次向他們澄清我剩餘的Kruger尾數，因為成個Kruger要成三千幾蚊，但他們只收我一千多元，經過多天的教訓，對於這裡的人說的任何一句話都很難再入信，問題是他們藏有我的信用咭資料，他們會不會在我回港後，會突然反口，追收我餘數的五千多元? 係咪真係咁著數，連Kruger的尾數都唔再收我?? 如果Kruger的尾數真係唔收的話，咁我係絕對有賺，可曾聽到有人用千幾蚊就去到Kruger?? 所以為了不讓他追收我的五千元餘數，我寧願自首給他二千元的餘數，但這個決定我是錯上加錯! 不安會令人大亂，當我再次confirm是否唔收尾數時，對方雖然保証，但竟突然收我600元的上網費(此舉他從來冇同人計過)，我突然間唔識回應，竟然再次相信他唔會再收尾數而比左果600蚊佢，當時我以為自己其實有賺，因為用千幾蚊去左Kruger，而家比多600蚊，又唔係要比多二千幾蚊，但係其後我發現這筆欠款在我回港後才追收，我…..真係後悔莫及!!! 點解???? 我仲要懵到送上門??? 寫到這裡，很想「星」一巴自己!!!! 但係當時我已經一心要走，什麼都不想理會。

我很高興，今天我只等了20分鐘，Soweto Backpacker已有車接我走，一次比一次好，而且發現可靠同準時與否，和種族並無關係，我也要收起我的成見。原來司機就是Lebo本人，即是旅舍的老闆，坐他隔離是叫Philip – 他的助手，他們一路上也不時有向我介紹沿路的建設，不過相對較為內歛。一小時的車程裡，燈光越來越少，因為停電已不是新鮮事，缺電的情況更活生生在我面前呈現，可是受苦的盡是貧窮的黑人老百姓。一入到黑人區，燈光只靠車頭燈，餐廳也只有洋燭，買了一盒羊骨飯後，就返到旅舍休息。剛才通電話的Maria迎接，是一位頗sweet的白人女子(咁奇，呢間野白人開架)，今晚旅舍也停電，只有大光燈，她略作介紹這裡的設施，但原來她和老闆明天要去開conference，所以不會見到她，真可惜，樣都未睇真就走! 在Soweto有一間旅舍，自然不只去一些大路的景點，我選擇了一個walking tour同到Kliptown參觀(Kliptown是Soweto最窮的部分)，並表示有興趣參觀福利機構，她都很可靠地幫我安排。我較為放心，由於只有有限的燈光，不能有太多活動，反正摸黑沖涼也已用了不少時間。今晚十點半就訓，告別這荒誕的一天。

(註︰今天心情太差，沒有心情也沒有機會影相)



在這裡先解決晚餐的問題，看到嗎? 這裡烏燈黑火，全區在停電中

羊骨飯，都要成五十蚊一盒，羊肉頗為韌

停電的房間，我訓上格

經驗分享︰

1.      經過這多天，印證了開普敦同約堡是兩個不同的天空。最大原因是開普敦有旅遊服務中心，但這裡，我懷疑沒有這樣的中心，致令旅舍取代了旅遊中心的角色。

2.      建議在找旅舍之前，不妨預先看一看一些網友對旅舍的comment，他們對這些hostel的評價的確某程度上反映事實。例如hostelworld。而發生今次事件的旅舍，Lonely Planet基本上對這旅舍是有讚無彈我才預訂，誰知…….這反映一切只依賴旅遊書，實在相當不夠。

3.      為了好好保障自己，在約堡似乎不能萬事太過大安旨意，預備任何的可能性。特別去維多利亞大瀑布，原來訂左package可以去唔到而且沒有預告，做完晒所有既VISA先話你知冇得去；但並不能肯定這次屬於個別事件還是這是南非旅行社的bad practice，所以都係同一句，如果各位想去的話，還是預先自己在香港預備一切，上網能夠方便地做妥，仲有白紙黑字的証明，竟比親身做手續更可靠，認真諷刺，而且隨時遇到缺電的問題，會影響找尋資料的進度。建議可直接預訂那邊的住宿，通常住宿那邊會有最多的資料，找到落腳點就會知可以點樣去玩。

4.  公平一點，論環境、空間感、舒適感，這裡不比開普敦的差，問題圍繞的是服務，如果完全唔用這裡的服務(除shuttle無可避免外)，可能不會覺得感覺咁差。而且住的價錢亦都真係唔貴。值得推介與否? 認真見仁見智。