伊朗遊記︰前言

繼南非之旅後，不時有些較豪華的自由行遊記post上來吊命，以免封塵。但正如我的introduction講，就算係豪華團都好，只要係經過自己一手一腳自己計劃的，才算是真正的旅行，說實話，跟親團都冇好結果，即是說去完等於冇去，對於之前去過的跟團trip的印象幾乎得返零，唔知自己去左D咩既感覺好lost。

講返正題，今年選了伊朗作2010年的目的地，其實原因冇南非咁明顯，伊朗不是那種睇完就立即好想去的地方(齋睇相同景的話)，但LP話伊朗人對遊客既熱情好客，成了佢既highlight第一位，就真係令到我好奇想試下，一個hospitality既民族會係點既呢? 同埋之前的地點，同當地人的互動不多，但不約而同看見去過的朋友同BLOG都寫伊朗人好主動，好友善，睇過好多風景山水，這回不如轉轉角度，看看當地的「人」吧! 這是第一個想去的原因。

之後再睇下D景點，伊朗不是那種景色好靚的地方，但其建築，別樹一格的文化氣息，獨特的宗教氣質，覺得去「冒險」一下又何妨。而且在旅行方面，我是頗為反叛的，別人覺得無可能去到既地方(應該說︰係明明去到，但又被大眾聲音認為去唔到既地方)，我偏偏想去揭佢既神秘面紗，為左啖氣，為了証實伊朗係一個咩地方，鐵定於9月20日至10月6日，進行16日的伊朗之旅。

結果，我安全回來了，不就是一個最好的証據，証明伊朗係一個可以去的地方嗎? 值唔值去係一件事，問題不要盲目聽信傳媒抹黑伊朗的說話嘛。

我會繼續沿用南非之旅的模式，在適當時post出旅遊心得，不過其實要逐日逐日list出旅遊心得好困難，因為伊朗好一致，有些旅遊心得可以應用在好多日之中，所以我會另外加埋食、住、生活的部分，作為旅遊心得的補充。另外，由於每天的支出太散，我亦會在每一day裡post我所用過的支出讓大家作參考。

好了，是時候出發，在為大家報告之餘，我也藉此多去一次伊朗。

不過出發之前，一定要簽証，簽証當日諗住朝早攪，誰知係伊朗的拉馬丹月，開放時間遲左，我要在同一朝立即由灣仔會展撲去中環的印度銀行交717元，如冇影印護照，仲要比多2元一頁的影印費，交完錢立即撲返去交返銀行單，等十日後就有得拎。簽証當日下午仲要返工，早知道搵日得閒先去攪，好彩最後都順利完成。我相信伊朗的簽証費會越來越貴，網頁的資料已經唔update喇。