伊朗(二)︰難為正邪定分界

本來睡得很好，但突然房外面傳出好像樂器般的奇異怪聲，維持了十多分鐘，我不是講鬼故，這些聲沒有令人感到好驚，只係覺得好煩。

伊朗的酒店好興包埋早餐，酒店的早餐當然比較豐富，中東麵包、沙律、芝士、雪芳蛋糕，由於欠缺肉類，我覺得最好味的已是腸仔炒蛋，真係好好味，因為炒蛋加了鮮奶去炒，變得滑上加滑，使我在這旅程中，越來越愛吃蛋。

 Mashad 酒店比較豐富的早餐                                  

既然叫我試下去問今朝會唔會有機票去設拉子，於是九點幾等到間agent開門立即去問，職員好努力咁check，她竟說今天12:15有機位，問我走唔走? 本來諗住今晚免費住多晚酒店WOR，咁咪冇得住? 但如果今日唔走，一切就會變得好麻煩，所以寧願蝕一晚住宿，當機立斷決定立即check out離開德黑蘭，agent又幫我call taxi，盛惠IR 80000，當時我還是初到貴境，對一切距離價格毫無概念，折算為港幣六十元左右，我諗住香港都係差唔多，想也不想就應承。至於酒店不肯答覆能否幫我換另一晚代替今晚，只叫我同返香港的agent傾，我不想再浪費長途電話去問一些不肯定的答案，要是冇得再返去住，也就算了。的士準時到達，現在我正向著德黑蘭另一個機場 – Mehrabad Airport進發，這機場主要走國內航線的。到左機場，終於有些時間清理下D遊記。不過總覺得之前的過程怪怪地，會唔會係一個「局」，坤我焗住搭的士，然後旅行社從中取利呢? 有些不安。

 伊朗係一個男女有別的國家，入機場都要分男、女入口安檢       

Mehrabad International Airport，但唔覺有國際航線   

這星期原來是兩伊戰爭紀念週，難怪周圍都係戰爭展覽    

航機冇delay喎，準時起飛降落，一小時便到達設拉子國際機場了，設拉子的天氣酷熱，好辛苦，出機場前先找information centre問出市區的士收費，並請職員幫手寫下我要去的酒店地址，但係就咁出去，都好難就咁截到車，又被我發現了一個電召的士的counter，報價IR40000，竟然仲平過information centre報既價，攪錯呀? 點都好啦，拿拿臨返到旅舍先講。

設拉子國際機場       

坐左45分鐘左右，到了Sasan Hotel，這間是集合LP及一些網友的意見，表示這間旅舍的質素不錯才選這間，LP說這間旅舍是由一位懂英文的老人家經營，我第一隻腳踏入去就認識他了，他第一件事劈頭就問我是否包車去波斯波利斯(去設拉子的目的，幾乎都是為了看這個古老遺跡)，用英文不斷推介Persepolis連Pasargadae，由於我知道Pasargadae冇咩野睇，於是我話只去Persepolis及另外兩處地方，佢開價IR350000，大約35美金，由於我當時已經冇咩現金在身，不和他傾任何野，所以藉辭離開換錢，比較一下匯率。

出到街非常冷清，這時只是下午3時多，人生路不熟，幾乎找不到任何找換店，後來找到一個騎呢無店名的，是惟一有開門的找換店，在混亂的情況下，後尾發現用了一個比旅舍更差的匯率換錢，不過當然我唔會一次過就換晒成副身家啦，在這時我也看見了一間Pars Tourist Agent，順便入去做下報價，誰知他們做17美金一團，只可以上午出發，其實我一直不打算跟這些tour，因為佢地一定趕頭趕命，想留多陣都唔得，所以我寧願包車，換取更多彈性。返到旅舍，老細竟然主動減價到IR300000，係咪知道我出左去格價而心虛，於是我打蛇隨棍上，話人地真係好平WOR，再減啦，最後我話如果IR250000，我就立即比錢，於是成交了，後來望返LP，這個價錢都是合理價錢，我後悔沒有開更平的價錢，不過算啦，對於一個好唔鍾意講價的人來說，這已是一個很成功的經驗。除此之外，老細不停向我重覆幾句話︰「Western media is our enemies, don’t believe them」我回應︰「就係我唔信那些media，我才來的嘛」，不知是否這樣，又加添了講價的籌碼。不過房價就死都唔肯減了。

安頓好後，時間已經較晚，大約4:30，我按圖索驥，先用十分鐘步程，到達設拉子的地標Arg-E Karim Khan參觀，自從Zand王朝已經建成，為一座城堡、庭院、澡堂，並有軍事用途，十足十一座中世紀城堡，在這裡逛一會，買些手信，開始感受伊朗人友善的氣氛，因為沿途不時有途人向我say hello。

一路由旅舍行去Arg-E Karim Khan見到的設拉子市容     

終於到達Arg-E Karim Khan對開的廣場        

Karim Khan內的庭院               

另一角度                                    

這應是Karim Khan接待外國使節的場景         

燈光昏黃的澡堂                    

我見到座城堡咁雄偉，當然好想同佢合照，就隨便找個途人幫我影，影完之好，佢似乎想收我錢，我就扮唔明佢想做咩行埋一邊，未知是否我叫人拍照的動作太矚目，突然有一位斯文俊朗的Tourist Police趨前，用非常流利的英文自我介紹，並送贈我一份設拉子的免費地圖(原來伊朗係有呢D野架)，既然係咁，當然唔放過佢，過程中他相當有耐性講解有咩推介景點同點樣搭車，仲教我一些景點同問價錢的波斯文，無奈相機在這時無電，我迫於無奈要回旅舍差一陣電，順便消化一下他的意見，他真是我第一個伊朗的天使呢!

順利和Karim Khan城堡合照

考慮過他的意見後，這晚我決定夜闖Aramgah-E Hafez(哈菲墓)及Quran Gate(可蘭門)，於是我想打擾Police哥哥一次，佢似乎在counter好悶，無所事事咁，見到我佢好高興，因為有野做喇! 佢教我搭共乘的士，於是我就抱著冒險的精神，走到熙來攘往的街道上，企圖截車去上述兩地方。我在Shohada Square，就是地標以北的地方找車截，吸引了兩個波斯青年的注意，他們一個叫Sadegh，他英文較好，一個叫Abbas，不懂英文，所以幾乎全程都是Sadegh和我說話，表示他願意作我的嚮導，坐上Abbas的私家車，可以到處遊覽，由於我一早已經知道伊朗有著這樣熱情的個性，我沒有戒心，就跟了他們上車了。Sadegh話佢係英文教師，而Abbas則是電腦系的學生。他們一路在車上暢談，狀甚愉快。

Police哥哥提議晚上遊Hafez Tomb，是否因為這個迷人的塔呢?

晚上遊人如鯽，爭相悼念這位詩人     

到了哈菲墓，哈菲是伊朗的莎士比亞，伊朗人讀他的詩，都會有所領悟，於是Sadegh叫我心裡想著一個難題，然後他隨手拿來一本Hafez的詩集，然後叫我求其揭開一頁，揀一篇詩，詩集的擁有人是一名女孩，她用波斯文把篇詩讀出來，讀完之後他們的反應大笑，古古怪怪，我問Sadegh篇詩講咩，他只是叫我凡事應當盡力做，有問題便要解決，這個答案答左等於冇答，不過當不需太認真，其實都係得啖笑JEI

之後我們到了Quran Gate(可蘭門)，因為好想影下這裡的夜景，泊好車後，我和他們要橫跨一條五線的高速公路才過到對面，我個人開始發抖，伊朗那些馬路尚且要高度專注力才可以成功過路，呢條路過慢D都會變肉餅，於是他們兩個拖實我向對面飛奔，捏一把冷汗，這裡的夜景不錯，原來也有不少人在這裡拍照、hea甚至露營，同時Sadegh又幫我比埋入場費上去可蘭門附近一個可以眺望夜景的花園內，流連拍照。逛完後，又要過那條五線的高速公路，過完後Abbas做了一個很幽默的動作，就是突然摸摸我的心口，証實一下個心係咪已經跳左出來。

可蘭門對開，又係晚上一家大細遊樂的地方

很喜愛可蘭門的夜景                

擺放水煙管的小販，事關這裡有很多人HEA在這裡吸水煙     

在可蘭門對面見到好多人紮營，唔知係咪O係度賞月呢? 

阻了別人那麼久，我想都是時候回旅舍了，但是此時，卻因一些事情而出現反高潮︰Sadegh知道我明天會到Persepolis，佢叫我同埋佢地一齊去，但我話我已經比左錢，對方唔退返錢比我咪死，而且去Persepolis距離這裡成一百公里路，我直覺覺得佢無理由做好人做到唔收載我去，就算係我都不能接受，於是我話「如果真的和你們去的話，我不能坐免費車，一定要比返錢架」! 想不到Sadegh終於攤牌，表示「如果你覺得唔比返錢唔好意思的話，你可以比IR100000(港幣七十多元)作為氣油費，不過入場費當然唔駛比啦，因為You are my Guest!」，其實今晚我都覺得，都唔應該唔比錢，只是唔知應該點樣開口，問題是我只是來了伊朗第二日，我都知如果我坐到share taxi的話，按距離計算，今晚的行程絕對唔駛五萬元rials，但佢竟然開一個天價，即時想他似乎是當我係一條「水魚」，但係唔通去到呢個時間先同佢講價咩? 覺得真係好怪，因為從來我沒有定義他倆跟我是司機和乘客的關係，一直都覺得有些友誼在裡面，無論當作是無拖無欠也好，當作是汽油費都好，我都唔打算同佢講價，諗住差唔多到先比錢，誰知Sadegh竟然催我比錢...........我比錢的時候，Sadegh仲做左一件好驚嚇的事，佢繼續問我，有冇一些香港的錢可以比佢做留念，可能開銀包時比佢見到我有少少香港錢(我當時有一張10蚊膠紙幣、兩張20蚊)，佢叫我比D香港錢佢睇下，我猶疑地比張10蚊銀佢睇下，佢望完之後話好想要，我覺得好唔舒服，因為已經比左比搭的士仲貴的錢比你，而家你連十蚊都要拎我? 我婉拒他說這是我回港時僅有的盤川，然後搶回在他手上的十蚊鈔票，我話如果雖然比唔到錢你，但我可以送postcard比你，不過要返hostel拎，似乎佢有些冇癮，本來仲話自己趕時間，唔留咁耐要立即走，後來他都改變主意，但他仍然強調︰「我們今晚可以認識到你，我只是想拿些東西作留念，咁我以後見到呢張十蚊紙，咁咪可以永遠記得你呢個朋友LOR」，我心想︰「你見到張銀紙才會記得我，是否讓你會記得我是一棵搖錢樹? 你.......還是將我忘記算了」，我不作任何反應，postcard要唔要隨佢決定，只是我實在不確定眼前的兩個人，到底是忠還是奸? 無論如何，他們都陪了我一個晚上，禮貌上我都會送postcard同合照。

到達hostel，我送postcard比佢地，誰知Sadegh竟想拎晒40張走，我當然制止了他，這人真係是貪得無厭，臨尾佢的小動作告訴我︰他已很不耐煩；惟獨是Abbas，我真心覺得他是好人，從最後一刻的眼神及握手力度已感受到。

這刻我的感受非常複雜，複雜源於太多到過伊朗的遊客對這裡的人有太多正面的評價，但今晚的經歷又似乎不太配合，他們的表現(我想主要是Sadegh)令我懷疑伊朗人好客的動機，往後十多天是否我要好像提防小人般提防主動接觸我的人，我不想這裡，要是這裡，那麼同我其他地方有咩分別呢? 今晚的經歷，久久不能消化，惟有告訴上帝然後好好安睡吧!

上面那張是Sadegh，下面是Abbas

旅遊心得︰

1. 其實我覺得今日去好多地方都係overpay，我諗今日當買一些教訓吧!

2. 去左伊朗16日，暫時只有設拉子有旅遊地圖

3. 哈菲墓是當地無人不曉的地方，但遠離市區，police教我讀「哈花思yeah」，別人就會知道在那裡。

4. 夜晚選可蘭門去一遊都係明智的選擇，這裡的夜景不錯，可蘭門側邊有一片休憩的地方，更多買門票上露台俯瞰可蘭門，但價錢不詳，我相信都係IR5000左右；如果自己搭的士去的話，我覺得就算貴少少都應該叫司機車到門口會比較好，因為要夜晚橫過一條高速公路，是一件藝高人膽大的事

5. 原來在設拉子Arag-e Karim Khan對開的廣場，係有兩個服務遊客的地方︰

我同Tourist Police熟d，police話有問題的話，我兩邊都可以搵，只是一邊屬於警方，一邊屬於旅遊局。但係其實形同虛設，遲一集再講。

第二天重要支出

支出	價錢(IR)
機票(TehranàShiraz)	465,000
單人的士到Mehrabad Airport	80,000
的士(Shiraz機場à市中心)	40,000
蜜瓜汁一杯	10,000
Arg-E Karim Khan	5,000
跟伊朗人坐車遊市內	100,000