伊朗食篇

有睇過我之前十幾篇既遊記，應該都知道在伊朗的十六天，大部分時間都係冇野好食，不是伊朗資源匱乏，而是食物內容單調無味，天氣乾燥，如果在香港我便可以吃拉麵、河粉，但是在伊朗除了那些烘麵包之外，想解渴就只有甜品、雪糕、果汁等等，所以有時索性一餐只喝不吃。

雖然如此，若果肯多付一點錢，怎樣都可以吃到一些似樣一點的食物，不如就在這篇，同大家分享下在伊朗和「食」有關的花絮。

這裡是第一晚Mashad Hotel的自助早餐，話晒都叫做三星級酒店，食物都叫做acceptable，不過幾乎係咁多日最好食既一餐架喇，自助早餐都算豐富，首先會有好多種飽餅、西瓜、沙律
 

呢度的鮮奶腸仔炒蛋，刺激了我的味蕾，一吃便是三碟 

這是唯一一次坐伊朗的內陸機，飛機餐看來都幾豐富，白色那些是雞肉，至於一大件綠色的東西很怪，其實都係肉餅類的東西，只是混雜一些不知名的香料，雖然比想像中唔係咁難食，但係始於口感怪異，吃了一半還是放低了。

值得一提的是，我在伊朗愛上了吃蕃茄，伊朗蕃茄少了一陣酸味，非常清香可口。

這是典型的伊朗hostel早餐，通常是一堆中東飽，加一些果醬，再加一隻雞蛋，好運的還會有水果、蕃茄、青瓜、咸乳酪，有些會供應橙汁。

不過一定唔少得的就是這些伊朗茶，伊朗人飲茶必定落糖，通常他們會含住粒方糖，然後飲茶，茶加糖的香味便會在口內溶解；另外可以好似圖中咁加砂糖沖茶飲，我較喜歡這樣飲；無論咩方法，都覺得幾好飲，唔覺得好怪

這是其中一天在設拉子吃的羊肉Kebab，講真志在飽肚，食的時候只食得落半個飽，後來齋食肉，之後連食肉都覺得乾，索性食晒件蕃茄；所以呢兜野裡面，我覺得蕃茄最好食

在伊朗另一種好common的是燒雞，基本上在沙漠氣候裡，淨係食雞已經飽(唔知D伊朗人會唔會覺得我好浪費食物?)，一如以往，我會把蕃茄全數吃掉。

這裡是Yazd Orient Hotel的自助晚餐，這裡終於有較正常的牛和雞，還有飯，後來還有肉醬意粉，算是抒緩了肚皮的「詐型」

這是另一晚在Yazd吃的魚飯，伊朗的飯同平時食開既唔同，比較乾身，同一定會有檸檬同一堆黃色野，黃色野應是一些番紅花的香料，所以這裡的飯都會有少少香味，我覺得都唔錯，只係飯較乾未必食得落成碟。   

在伊斯法罕拜訪了一名伊朗人，他請我吃lunch，除Pizza外，後面的醬是用來點沙律，碟裡面是煎蛋角，Delster是無酒精的啤酒，這一餐我吃得相當滿意，原來伊朗既Pizza唔係咁熱氣，一咬落去全部啖啖肉，如果唔係要注重「儀態」，我估我唔會食兩件咁少，我想在伊朗，Pizza應是比較中產的人的食物

「食」就講到差唔多，講下「飲」同甜品先，在伊朗飲水完全不成問題，在主要的車站、旅遊景點或街頭，基本上都會見到這些水機，只要帶個水樽出街，隨時隨地就可以斟水飲，而且水溫極為冰涼，簡直是消暑妙品。

如果口淡淡，在大城市周圍都有呢D果汁店，其實呢D唔只係果汁，係思樂冰來的，仲係非常之甜，我這種嗜甜的人一喝就上癮，只可惜其實都幾貴下，惟有飲下水或者可樂就算    

相信大家都好想知道反美的伊朗，到底會唔會有可樂賣，答案係，一定有，呢張係機場映架，連機場都可以買到，相信伊朗政府已經確認左可口可樂既位置，伊朗亦似乎唔需要再推出A貨可樂了，只是在街上，好似買百事容易D

除正常飲料外，在設拉子Sadi墓的舖頭裡，看見這種無色的飲品，這是玫瑰水，有一些淡香，頗為清甜，和果汁頗成對比，如果唔鍾意飲得咁甜既，玫瑰水/番紅花水會是最佳選擇

雪糕是另一種消暑妙品，而且價錢更平，伊朗的雪糕似是介乎雪糕及年糕的混合體，很黏的，食完之後相對比較飽肚  

這碗伊朗式豆腐花叫做Fereni，其實是由麵粉加埋糖及玫瑰水製成，食法與食豆腐花無異，不過唔係用豆來做，所以係一碗冇豆味的豆腐花，我在伊朗吃過兩次  

同樣是伊式甜品Faludeh，又稱「意粉雪糕」，黃色的是番紅花味，食法其實就係兩邊撈埋食，食呢兜之前食左上面那碗Fereni，所以覺得好飽，食唔晒D意粉

這些叫做Gaz，是伊斯法罕特有的糖果，我試食過一粒，最後決定唔買返去做手信，事關糖太黏同太甜，我反而買了一盒龍鬚糖返香港(竟然唔記得影相)。但無論如何，在Imam Square，周街都係賣Gaz的舖頭，得閒行行下試返粒都不失為一個體驗

通常坐長途巴士，總會每位派一袋茶點給乘客，裡面通常有餅乾、小蛋糕、朱古力條同一細包果汁，這些小茶點，陪伴我度過了許多個飢餓的晚上   

睇左咁多，其實都冇咩機會吃到什麼特別的伊朗菜式，事關我都冇刻意找一些特別的餐廳食飯，始終一個人唔食得幾多，在最尾的一晚住在Masuleh，有機會吃到Dizi，算是唯一一餐頗為「伊朗」的菜式，在伊朗(十五)那天的遊記，有描述我吃Dizi的過程。

總之一句，如果各位去旅行的目的只是想找好野食，伊朗必不是你那杯茶，反而甜品卻有些特色。