David's travelling journal: 伊朗(五)︰闖蕩阿茲德

巴士在我半夢半醒的時間到達亞茲德(Yazd)，時間大約是凌晨3:30，身處這個在沙漠邊緣的城市，而且巴士站萬野無人，我要立即拿出風褸抵冷，在躊躇著是否要龜縮在巴士站等待太陽出現之際，原來巴士站一早已聚滿的士，有個counter協調收錢及安排的士，我告訴counter我要到Silk Road Hotel，他便收我IR28000，然後安排的士讓我上車，驟眼看其他搭客好似都係比大約咁上下價錢，所以咁夜都唔想講價，我只想盡快找個地方悽身。
車程只是大約半小時，我到達酒店門外，大膽敲門柄，出示book房的email，一位年青人帶我入房，暫時不用check-in，實在太好了，而且仲係一間幾舒服的房，終於可以好好睡一覺。

凌晨時份闖入Silk Road

大約睡了六個小時，上午十時就起床了，沖個靚涼之後，出面做埋check-in同食早餐，這裡真係好得，係人生住的hostel之中裝飾得最靚而且收得最貴的一間殿堂級hostel，閱讀著hostel的guestbook，有很多台灣、國內甚至香港的同胞都來過，看到很多令人懷念的中文，圖文並茂，睇guestbook都係一種娛樂，而且仲有好多TIPS，不過似乎我今次未必用得著。

Silk Hotel的庭園，就是上網、食飯、HEA、reception的中心

搵左好耐，先知個門鎖原來o係上面，激死

一出街冇幾遠就係Jameh Mosque(星期五清真寺)，建築比起鄰近的泥屋群顯得鶴立雞群，清真寺內部結構簡單，但勝在舒適。說也奇怪，亞茲德這裡比起設拉子濕潤，因為今天已沒有爆拆，不知是否這裡的風塔利用冷水製造空調有關呢? 總之，以氣候來說，這裡比設拉子舒適。

修葺中的星期五清真寺

星期五清真寺內

然後開始進入古城，開始所謂「Get lost in Yazd」之旅，其實要get lost都唔容易，因為裡面不時有指示牌指示方向，再加上Yazd的豆泥地圖輔助，不消一會便到了有冷氣的Tourist Centre坐坐，順便格下價，誰知這裡提供的團仲貴，因為通常係最少四人至九人包團，職員又表示自行搭的士好貴，似乎佢都只係鼓勵我返去Silk Road跟團就算。然後我繼續去附近的Alexander’s Prison及Lari Mansion，星期五的Lari Mansion係無政府狀態，counter係冇人收錢，於是我就落去盡情參觀，不過這裡都是一個有錢人的大宅。

地下一圈圈的光，就像天上有好多天使開電筒射落人間似的

沿途見到一座泥造的遊樂場

到處都是指示，很難迷路

這裡的屋通常都會起低D，會涼快D架

門鎖都分男女，不過我男女不分，唔知點個打邊個

這是Alexander Prison，除左有一個疑似監獄的地方，整個地方就只是有些茶室、賣手信的地方，有冇野睇就真係見仁見智

無人看管的Lari古宅

在亞茲德有好多地方都會見到呢舊野，原來呢舊野叫Nakhl(在後來伊斯法罕的一張明信片得知的)，這其實是一個「棺材」，我估計這件東西應該和紀念聖人有關，不過未得到証實

下一站本來諗住去錢幣博物館，找了一會都找不到入口，就在這時，又有一名伊朗人(但樣貌似歐洲人多D)見我行來行去，主動問我有什麼事情需要幫手，原來博物館因假期關了門，於是他就和我攀談起來，後來我們走到一個小公園坐，join了他另一個朋友，他們趁有假期，就來到阿茲德這裡寫生，他們都是從設拉子來的，都是修讀建築，他們廿多歲，又是一個懂英文，一個英文較差(為何時常會有這樣的組合)? 懂英文的那個叫Ali，另一個的名字不太記得。我們就吹一輪水，講下建築、工作，之後他仲問左我好多去外國旅行既野，因為他們很想周圍去，但無奈資訊缺乏，人工很低，不知從何起步，他們也不太知道LP是什麼，我勸他先找些旅遊書，想想自己要去那裡才出發吧! 傾下傾下，也是時候離開了，他們表示今天有空，可以一齊同行，看來他們沒有駕車，所以不需考慮是否比返佢地車錢的問題；我打算先去Amir Chakhmaq，Ali的朋友要先回家取鎖匙，於是Ali和我先去再等他，一邊行，才知道Ali一家五口有四人是藝術家。

我們到了Amir Chakmaque，影一陣相之後，匯合朋友，Ali似乎相當肚餓，常問我有冇吃午餐，而我的禁食計劃係無變，盡量以汽水替代正餐，婉拒了他。之後乘share taxi到市內的拜火教神廟Ateshkedah，可惜裡面冇人，無法內進，我只能在遠遠的門外拍照便算，由於是假期，亞茲德真係冇咩好行，難怪Ali說長期留在亞茲德是會depressed的，於是又走返去Amir Chakhmaq，今次可以上埋天台，俯瞰這個泥屋之城。我地返落去的時候，Ali話時間好晏，問我食唔食晚飯，看來他真的很肚餓，由於我唔想佢地請我食飯，於是話我唔肚餓，不過佢地可以去食野我可以飲野，於是Ali他們請了我吃了一支雪糕。途中問及他們是否要服兵役，原來Ali有些特別原因，申請了不需服役(神秘的原因?)，但他朋友下年就要服役兩年，因如果不服役，就唔駛旨意出境，他們似乎都不太想服役……

在和Ali一起的時候，經過這一間華麗的餐廳買水飲

Amir Chakhmaq，市內地標，用途不詳

可愛的設計

關閉了的拜火教廟

只能遠遠影下拜火教的符號Faravaha

有趣的風塔

從Amir Chakhmaq瞭望亞茲德

同行的Ali(右邊)和他的朋友

時間也不早了，我以為佢地會一齊去飲野，但係佢地原來諗住買衫，咁我就一齊去，基本上全個地方都冇舖頭開門，佢地要打電話叫人開門先可以買衫，Ali話佢要幫佢既家姐揀披肩，於是就好仔細咁揀，等他的時候有一個伊朗人走來打招呼，並問大陸邊度買鋼琴、結他平，因為想用來賺錢，我叫他去西安或新彊試下，這些地方似乎比較近伊朗，之後那個人又帶我去對面的一間猶太廟睇下(係相當隱蔽的)，不過不准外人入去。我等左大半個鐘，天都差不多入黑，我相信Ali應該仲有排揀，我想這是一個要分別的時間了，送上明信片後，大家就此告別。

這晚，我決定要食好D，之前友人介紹了一間Orient Hotel內有自助餐吃，本來以為夠晒鐘，我個錶顯示19:45，但係又因時差問題，真正時間原來只不過係18:45，要等到19:00先開始有得食，心裡說了一句「頂!」，我到左伊朗咁耐，完全唔知道正確的時間。

今晚是多天以來吃得最開胃及正常的一餐，起碼有牛、雞、飯同意粉，不過都好貴，要成IR80000埋單。之後行去Amir Chakhmaq影一陣夜景，穿著涼鞋可能真係唔適宜行咁多路，行到我腳痛，攪到要跛下跛下咁行，不過沿途仍遇到不少打招呼的路人，其中一個伯伯用拳頭放在心口的祝福姿勢打招呼，雖然腳痛仍然覺得溫暖。另外，我知道在Chakmaq附近有一個健身俱樂部，諗住睇下今晚有冇表演，裡面有一對夫婦用盡身體語言，話比我知今日唔開門，聽日先開門，我決定聽晚會再來過。

你估唔估到呢部係咩? (反白可見答案)︰土製冷氣機