美國拉斯維加斯(二)︰初到貴境，烤熟鳥

今天帶著幾近失眠的狀態，開始今天的行程，起身之後第一件事，當然就是吃免費早餐，又食又拎，不過都唔可以食太耐，因為唔想太晏入LV，所以我們大約八點左右就出發了，這一個車程我是在半夢半醒的狀態下進行，因為昨晚在房間出現了轟炸機。

在正式到達LV之前，我們先到一個頗著名的景點 - 胡佛水壩(Hoover Dam)的觀景台參觀一下，到達時大約是十時到十一時左右，氣溫灼熱，而這裡的設施很簡陋，似乎唔太suppose好多人入去參觀，而政府亦應好緊張呢個地方，因為呢度供應左加州、內華達州(當然包括好重要的LV)、亞利桑那州的電力同水，如果呢度有咩冬瓜豆腐，這邊的經濟會癱瘓，好大鑊，進入時會有保安check-in，不過似乎我地呢D遊客都唔係佢地既目標。

這個就是1936年建成啟用的胡佛水壩，除了供電、供水，仲有旅遊景點，是當年一個巨世的水利工程；真正的旅遊中心應在這張相左邊的一座建築物，而我們這裡只是一個觀景台

這裡正處於兩州分界線的位置(內華達州及亞利桑那州)

簡陋的停車場


據聞不知那套荷里活猛片是在這裡取景；不過去完影城之後，知道可能放幾隻布公仔o係度拍幾個shot，然後加特技而成的product

見識過這個浩大的水利工程後，我們再次趕路，向著靡爛的LV進發，我們大約在十二點半到達LV的範圍，而這支「定海神針」，就是我們在LV的指南針，這裡屬LV的北方，是其中一酒店Stratosphere的位置，向南就應該會找到我們要去的地方


駕車時經過可口可樂專門店同M&M專門店，今晚一定要過去望下


終於找到了我們入住的酒店 - Circus Circus

這間酒店算是相當超值，是朋友經團購購買的，US55兩晚，另計上網/設施費US17，雙人房加埋才US72兩晚，3人分，真係相當之平，不過當然我們有1個人要屈蛇，要訓睡袋；要知道，在拉斯維加斯，當然不是靠酒店收入，而是靠賭場收入。

Check-in之後，我們決定夜晚先入房，爭取時間周圍行，但第一件事，就係要醫肚，其實知道這裡除左有平房之外，自助餐應該麻麻，不過要去第二間酒店都需要花很多時間，所以就求求其其在裡面食就算，而食物亦在預期的質素，只可以說，不是難食，但款式不甚吸引，其實都是利用大量的肉類填飽你的肚皮，也不要在乎會有什麼色香味，我雖然我肚餓，也要控制自己，因相信晚餐會找到更好的，不要就o係而家把胃部填滿。

填完肚後，我們盤算著今晚的節目，因我知道Blue Man Show是很出名，於是到酒店的娛樂counter問下，索取了blue man show單張，check到仲有位，不過就要過去威尼斯人買票，於是立即駕車，以免買唔到好位，在LV睇show，其實係唔需要預先買定飛，因為佢地預留大量即時門卷，被遊客即時購買，只要唔係太遲，都係應該會有飛的。

所以第一站，就是先參觀威尼斯人酒店，望落去，同澳門那間的格局差不多，當然面積始終是LV大得多


不知拐過多少彎，原來一間酒店大到行左差不多半個鐘先搵到個theatre，期待今晚的show


位於沙漠中心地帶的LV，常有被烤熟的感覺，慶幸我們選了晚一點的時間行街；我地今晚買左9:30的門票，飯又未夠鐘食，所以我們沿著Las Vegas Strip漫步，至MGM左右便停下，在那裡吃晚餐，再行返威尼斯人睇Blue Man。

除非真係時間多，要知道在LV，由一間酒店行去另一間酒店，隨時要行成十五分鐘，所以如果想行過幾間酒店，係要差不多一個鐘，這個距離，在香港我可以由太子行去尖沙咀又加程船過中環，不是騙你，時間不知不覺就溜走了。

首次踏入LV，太興奮了，朋友也影熟了，今次我一take過就完成這個「跳起」


同澳門比，呢個威尼斯人好似行極都行唔完咁，外面都有貢多拉坐架!

行到咁上下，我地走左入去一間超級市場，作少許補給，之後繼續行。行到這裡算是LV最熱鬧的地方，有個鐵塔那邊就是Paris，一陣間入去行下先!


行左一陣Paris，裡面裝潢都整到好似法式宮殿咁

我地都係潔身自愛的人，所以賭場同酒店是用來欣賞、拍照，每間酒店風格都有明顯不同，可是賭場真係好大，認認真真咁行，都最少要45分鐘先出得返呢。行完Paris，時值黃昏，LV街頭燈光璀璨，好像....晚上才是LV起床的時候......

今晚我們決定到MGM美高梅食飯，在沿路的M&M同可樂店，都行左一個圈，不過聽日仲有機會行，因為想買手信，由於下午忍了口，晚上仲識得肚餓，於是我們就到了MGM醫肚!


晚餐時間人比較多，需要等位，但係我地行下行下已經到7:00，距離一陣開show時間唔係好多，所以都幾心急，就在這時，我們的隊前面有幾個國語姨姨同餐廳「知客」指手劃腳，雞同鴨講，餐廳職員見到我們是華人，就請我們翻譯，因為那幾個姨姨不停講國語，對方都唔知佢講咩，朋友的國語/英文較好，立時充當翻譯，原來姨姨想問張早餐券可唔可以補錢當晚餐用，因為唔知係佢地唔知醒定個團冇時間被佢地食張早餐券，結果冇用，那麼當時職員唔比佢地拎早餐券補錢啦，話晒都係佢地個人既問題，姨姨亦只能無奈散去；但係做好人係有回報的，結果我地由普通隊變成排貴賓隊，亦即是唔晒等位即刻有得入去坐!! Yeah，上帝早已預備!! 也提醒我們要做好人。

MGM自助餐


在港澳地區，通常可以食到的剌身，呢度既酒店都好少提供，不過長腳蟹就源源不絕，所以我就主攻長腳蟹了!! 當然還有其他熟食，不過還是喜歡冷盤! MGM的晚餐係US33一位，似乎比較貴一點!


我地食到9:00，就要趕住走，事關我地計過，由威尼斯人行過來，起碼要半個鐘，仲要半跑半行先到，所以我們視之為飯後之運動，結果不負眾望，我們能勉強於9:40到達，遲了一點，有些狼狽，我們坐得較前，前面的觀眾都穿上了一套膠雨衣，睇呢都唔係好野.....

Blue Man Show主要是有3個把身體、臉上塗滿藍色，他們以木訥的表情，常在台上做出攪笑的動作，還不時會「刺激」觀眾，所以要著雨衣，還會請觀眾上台玩，過程大約有兩個鐘，不打算劇透，總之睇完感覺都幾愉快同幾輕鬆，這個show我推介。價錢US73一位

完show時，幾個藍人企定定同你影!!


Blue Man Theatre附近還有一個紀念品商店，可以買紀念DVD、T-shirt等，朋友似乎有些興趣，不過最終都冇買到野。

睇完show，時間都唔早，搵返架車，就返酒店了! 這回真係對不起朋友，我真係要訓床了，實在捱唔住第二晚既失眠.....