美國拉斯維加斯(五)︰紅土地錫安山

應該只睡了數小時。不過真係唔想太晏走，亦唔想錯過豐富的早餐，大約七點幾就起左身，但係昨晚擒擒青入左呢，都冇認真睇過自己住o係邊，原來呢度就係我地住緊既地方，看來紅紅的山色，我就知道，我們已經走進了一個不一樣的世界

這間旅館叫做La Quinta，好似係集團式經營，一間房US59，又係3個人分，住得幾舒服，而早餐亦都係幫襯過咁多間旅舍之中最豐富的一間，最起碼有肉腸食，同埋麵包蛋糕款式都唔少，仲有得DIY整格仔餅，這是我人生第一次自製格仔餅!

第一件事當然要淋蛋漿並噴一些唔記得係咩既野，又唔似係水，係咩呢? 我都唔記得

合埋個蓋，叮3分鐘


咁就攪掂晒! 然後揀自己心愛的果醬或牛油，就食得喇，但好飽肚的，我都食唔晒


由於又想諗縮數，一餐當兩餐食，所以食左成個鐘頭，耐左少少，整間旅館真係唔錯，可是係住得最短的一間，食完早餐就立即要check out，想流連多一陣都唔得。然後我地又坐車，入去錫安山國家公園的範圍。

其實出發前我同朋友出發前，預算在LV只想留三天兩晚，但因機票問題等種種原因，應該仲可以stay多一天在LV一帶，而我一直都好想揀一個國家公園去(本來仲諗住去埋黃石，不過原來冇咩可能)，所以朋友問人後，發現原來這個位於猶他州同內華達州接壤位置的錫安山國家公園，都是一個值得一去的地方，所以就揀左呢度去。錫安山國家公園裡面有好多類似大峽谷見到的岩層型態，不過這裡更紅更艷，石頭都是以砂岩為主。

在進入國家公園之前，朋友在這個蘋果園停低，而我地亦都相當舒服，我們也在這裡歇了一會，朋友就採摘一些新鮮蘋果來食，雖然係任你摘，但當然要自律比錢啦，埋面有間小店可以比錢的，而遠望這些砂岩尖頂，已經覺得好有型


果園的另一角度


公路邊



我們到了公園範圍了，在這裡找個地方泊車，之後我地就可以免費乘坐穿梭巴士進入公園正門


車都算幾密，直達公園範圍內Temple of Sinawava總站



錫安山國家公園最靚的地方，應該會以遠足方式去搵，不過由於9月天氣相當悶熱，而且決定去的時間很倉促，根本沒有帶備任何行山設備，而且時間不夠，也就只能好似上次大峽谷咁，遊下車河就算，雖然沒有到達最核心的地方，不過我覺得四周的環境亦都已經頗為壯觀，暫時在精神狀態不佳的情況，都已足夠。

回望公園的入口


遊客中心，同時也有一些行山裝備可以購買


出左遊客中心，繼續坐巴士，巴士司機也會沿途講解的，不過掛住影相，唔係好知自己去緊邊度，這裡就是沿途景色







這3個尖山頭，又叫三聖父，佢地有名架，不過我淨係記得一個叫Abraham


錫安山也是著名攀岩的地方，之前好似見到有人攀呢個岩


到達巴士總站Temple Sinawava，巴士總站亦是多條遠足徑的起點，可能下次要準備充足糧水，先可以探索更精彩的錫安山奇景了!


結果我們大約留連了一個上午，中午就坐返巴士返來搵返間車回去LA了，不過朋友話沿途找個信箱比我寄明信片，會有猶他州的chop印。

回程的路程上，風景仍然很美




望下去有一個小小鎮，朋友車左落去那個不知名小鎮，找信箱寄明信片


到底只是一般氣流、龍捲風，還是只是幻像...........?


多天外省的行程，亦都差不多近尾聲，真係好累，我最幸福，因為唔駛揸車，話訓就訓，真的有點不好意思。由於由這裡直接返LA條路都幾長，所以朋友話可以於其中一個outlet停下來，又可以食飯，又可以滿足一下我想行outlet的心願。時間大約到了黃昏時分差不多六點，我們到達了Tanger Outlet Centre，早餐過後，我也再沒吃過東西，所以當然醫肚先啦，一到步，就見到一個美國頗出名的漢堡包店In & Out，朋友話In & Out漢堡包的質素比麥記高幾班，我都一直好想試下，今日終於有機會!

In N Out好專一，主要賣漢堡包，不會賣其他立雜野


原來佢地既賣點係即叫即製，漢堡也是新鮮煎好然後即刻放落個包度，不過呢張係偷影的，因為之前被人制止我影相


新鮮漢堡包出爐，睇落去最興奮的，就是king size份量，好一個肥美的漢堡包.....恕我直言︰再一次解釋了，為何美國通街都有king size的人肉走來走去

在香港，我是一個喜歡食肉的人，但不太喜歡吃漢堡包，除非極度肚餓兼毫無選擇，食完麥記，感覺係滯，食完In N out，感覺係更滯，我認同係好食既，不過就唔多鍾意太滯的感覺。值得一提是，這間In N Out，汽水是任添的，美國好多地方既汽水都係任添，真係想唔肥死都幾難。

全美國有好多間「名店」組成的商店群，叫做outlet，我都係去美國先知有呢樣野，事關平日都少留意D衫褲鞋襪既野，而這裡賣的當然不是什麼潮流尖端的東西，不過勝在叫做比較平，而我一場呢到，當然睇下有冇D o岩既野掃下貨啦。




呢度大大話話都有廿間舖頭，不過時間都幾夜(其實只係七點幾八點)，有些都準備關門。我地roughly逐間行，找到一件風褸本來想買，但係原來真係「鬼佬size」，係唔多o岩我呢D矮小手短的中國人穿(沒有種族歧視，因為的確中國人整體都比見到既美國人身軀嬌小)，結果亦只能放棄。總共行左一個鐘左右，我地就坐車返LA，返到LA，終於可以有得休息喇!

而我地為左令完結之旅更興奮，決定在車上用notebook唱K，愉快地完結這次旅程


送別山東朋友後，朋友亦送我回去之前住既Floral Inn，辛苦晒佢地喇!!! 聽日冇咩scheduled，還是好好睡醒再決定吧!!