好了，今天是美國之旅最後一天有行程的日子，今日就係執漏同買手信的一天，趁著還有時間，早上便先正式到金門大橋觀景台一趟，巴士達人又再出動，我坐BART到金融區，坐5號muni，到金門公園附近一北行路口，轉28號muni直達觀景台，雖然搭車算方便，但這樣一程，竟然用了大約100分鐘時間才到，又似乎頗為迂迴，我大約11:45才到步。
觀景台擠滿中外遊客，這段時間應是遊客高峰期，巴士都要等好耐先落到客，耳邊不停都是普通話同廣東話，不過我就自由好多!
金門大橋的建造人，他力排眾議在這裡起橋，結果還可以早過deadline交貨
雖然是一個地標，不過我又唔覺得佢好靚，橋身都是棕紅色，相當單調，相信出名都是因為一些歷史意義吧
可以步行的，不過我諗冇半個鐘都過唔到去，所以行到中間便折返了
在這裡逗留了約一小時左右，便乘坐28號巴士返漁人碼頭，在三藩市五天，有三天都去左漁人碼頭，不過因緣際會，朋友告訴我今天是三藩市飛行表演的首天，而我本來不打算留三藩市那麼久，但因為明天才有機走，先至留到今日；如果我一早走了，就看不到我人生首次觀看的飛行表演，我都幾好彩呢!
28號的總站在漁人碼頭外圍，要行入公園先過到去，途中見到一個疑似千與千尋的「無面人」現身
過左公園，再次返到碼頭的攤檔，吃了個A貨蜆湯酸麵包，再加埋呢兜魷魚，不過太酸了，不太喜歡
街頭還見到遊客專用的「高卡車」? 係咪呢個名堂? 總之細細地，好得意下。在LV、金融區都見過這類車在馬路上走動
在我吃東西期間，原來已經開始了飛行表演，六隻飛機正在劃破長空
醫好肚之後，我就慢慢步向剛才公園的方向，那處有一個看台，是觀看飛行表演相當適合的地方，坐了一會後，拿起僅有的傻瓜機，為有型的戰機留下倩影。
這個叫Blue Angel
遺憾只有一部傻瓜機，不過就算有大機都唔識用；可以有幸觀賞已經很不錯了。表演大約到4:00，在美國餘下的時間越來越少，所以我的目標相當清晰，就是要買手信了。沿路看到一架車好多人影wor，有冇有心人可以話我知呢架車有咩咁特別呢?
這裡不是伊朗，所以不會放人對人的戒心，當我看見這架車時，有一個吸煙的男人無端端話可以同我揸機影相，我既直覺竟然懷疑他是想問我索錢才幫我，於是我立時拒絕，但他竟再三表示可以幫忙，好像很有誠意，很快便「心軟」起來，結果証明，原來我又是「以小人之心」度人；那種「不要相信陌生人」的緊箍咒何時才能放低? 有時令自己也冷漠起來......無奈
Anyway，我選了Ghirardelli朱古力作為我的手信，始終朱古力還是較為大眾化，再加上grand一點的包裝，應該唔會失禮街坊。其實由漁人碼頭行到咁上下，離遠會見到一個相中Ghirardelli巨牌，這裡是一個商場，裡面有兩三間Ghirardelli的門市部，求其揀一間已經有排揀
我就在這裡買朱古力了
Ghirardelli的朱古力據聞都是自家製的，唔知會唔會特別好食? 不過因為我唔「好」朱古力，我諗包裝已經會令到人地覺得好好食卦
除左買比人之外，我當然亦都唔會虧待自己，事關這裡的雪糕一樣好出名，梗係要試下，味道的確唔錯，都幾重奶味，連埋手信總共用左US28落樓
其實如果唔係住宿唔駛錢，真係唔夠膽咁闊綽；之後繼續趕路，前往唐人街買埋最後一樣手信 - 人蔘蜜糖茶同人蔘，去唐人街，在Ghirardelli後面有條街有30號muni坐，直達唐人街，這間車頗為多人，我在塞車位下車，見到四處都係中文，冇理由呢度唔係唐人街
唐人街好似倒流到80年代香港的感覺
又見到「金字塔」喇! 其實根本唔知邊條街係賣蔘茸海味，不過求其行入一條街，就已經有十間八間，所以有排睇，第一次揀人蔘，原來係可以逐條試，但係試完其實都唔知點為之係好，反而攪到條喉嚨好涸，而且有些舖頭都要準時收工(聽聞唐人街治安較差)，所以最後還是草草決定；另外人蔘茶亦都冇揀錯o係三藩市買，原來真係平少少架。
這個就是我要買的手信，LA貴成起碼一、兩元US
時間不早了，要買亦都買完，差不多六點，我要啟程回去了，本來想找唐人街牌匾影張相，但係不想攪太晏，同埋我諗到到都差唔多卦。於是坐返30號muni返出市中心，這回突然要tune in華人的節奏，因為頗為塞車，於是D人見車就會搶住上，不會排隊，我再次驚醒︰「我真的在唐人街啊」! 於是我唯有化身同胞，一同搶閘上車，我都唔想咁做，真係趕時間。
不過即使上到車，都係塞呀塞，所以坐一、兩個站，見熟熟地就落車，落車後就見到一班人在遊行示威，對象是凱悅酒店，相信是爭取一些工人權益那樣的東西，唔怪得攪到咁塞車啦
原來有時遊行都幾好睇，唔怪得LP話香港入選2012必去城市十大，主要原因係因為有遊行啦!
其實我仲未買完野架，因為我還帶著LA朋友要我帶回香港的小printer，要找一個「四正」D既袋袋好佢，於是拿拿臨入左一間超級市場(好彩有)，買左個旅行袋，仲買左D postcard同多謝咭，而美國大約廿天的旅程亦真的要完結了。
晚上和朋友的仔打下機，影下相，度過了美國的最後一夜。
10月8日
我是坐下午機，所以早上不會安排特別行程，不過約了另一位三藩市朋友到友人家中小聚，他亦將會送我到機場，其實我們都是教會舊朋友，他大約十一時來了，我們坐一會，又pack一輪野，大約11:30就離開了。
現在才真正看見，住了四晚的屋苑是怎麼樣
在機場處理完手續後，友人又請我食飯，傾了一陣計，都夠鐘上飛機了! 此刻，也覺得是時候回家了!
我這班機的時間極其差劣，如果無時間的人，應該不會揀這班機坐，因為大約1430起程，到達北京已是10月9日的1755，但係到翌日0800先有機返香港，即係話漫漫長夜要在北京度過。今次班機冇delay(反而覺得如果而家delay會更好)，所以大約6:00到北京，本來打算晚上可在北京短遊，但不知為何到達北京後，完全沒有任何興緻周圍走，可能因為身上太多行李，而且精神欠佳，再加上機場裡煙霧瀰漫，我相信應該是有沙塵暴的情況出現，所以鼻子也有少許不適，身上尚預備了一些人民幣，就是必要時用來住宿用的，我決定都搵個地方hea，實在唔想訓街。我到機場一個可以book酒店的counter，揀一間最平的客房，誰知最平的要258人民幣，在毫無選擇的情況下，我決定入住。
之後有一位哥哥，帶我出機場，坐上一架私家車，天入黑了，只知四圍都沒有什麼大廈，不久到了一家單層平房、頗為簡陋的小旅館，心也有些少打個冷震，不過始終都叫做有得住，也就算吧，不要期望會有什麼好服務，那個接待員冷漠的咀臉，讓我知道「平」的代價，雖然如此，她還是安排我明天五時多，坐返旅館的車回機場。
這裡就是房間了，我躲在這裡睡、hea、睇電視，這裡還有免費杯麵及冰紅茶，不過餐廳就冇，我亦冇咩胃口，於是隊左支冰紅茶就算，而且大行李其實還在機場，我是沒法洗澡，也不能好好入睡，無論如何，總好過在機場無所事事。
我亦於5:00準時起床，準備坐車走，旅館內仲有一班好似來交流的學生一齊等，我擠上麵包車，突然覺得自己由天堂走進了地獄。
航機亦準時起飛，由於昨晚幾乎冇野到肚，記得之後問過一些空姐朋友，如有需要，飛機餐可以叫多份來吃的，其實這個早餐不過不失，而且機上的搭客極少，實在係「叫多份早餐」的最佳時間，果然OK，這是我第一次搭飛機叫兩次飛機餐食。
前後24天(有4日用來坐飛機)的美國之旅完結了，準時於十一點左右回港，這天，香港還下著微雨。好開心，可以好好睡一覺。
誰知一落機，即日已經要返公司攪埋D手尾....
但係我只會留港幾日，之後，我又會重返祖國，探訪雲南怒江，所以新blog還陸續有來......
待續....
沒有留言:
張貼留言