美國西雅圖(二)︰Show Good 西雅圖

光陰短促，留在西雅圖的時間其實不多，所以今天就精華地遊覽西雅圖最出名的地方，第一件事，當然係同朋友醫肚先啦，我隨口講食「越南」野(其實佢比我揀中、西、日、韓、泰等等....)，於是佢就帶我食越南湯河，味道唔錯wor，在這裡食越南湯河係好common既早餐。


另一個精彩亮點，就係呢個奶黃小泡芙，甜甜地又唔「漏」，在這裡是很普遍的家常小食，很多人都是一磅一磅咁買返屋企食的

食完早餐之後，朋友帶我到他就讀的華盛頓大學行下，仲入埋佢既office，睇下佢既thesis；華盛頓大學係一間好靚既大學，介紹西雅圖既旅遊書都會推介這個地方。而這裡就是中庭(The Quad)，最出名的就是眼前的4棵櫻花樹，而家睇落去冇咩特別，但係到4月的時候，這四棵櫻花樹就會開滿櫻花，是為重要景點之一

中央廣場


呢個view幾靚，這個噴水池就係Drumheller Fountain

漫步於華大，想起不少讀中大的片段，因為同中大好似，氣氛好正，特別係新亞書院。和朋友談論中，不免提到一些過去的人及事，一堆堆唏噓的感覺填滿心頭，我在想，其實有些人如果能夠著緊多一點，或際遇能夠好一點，命運就能否扭轉?

其實和這位朋友說了很多我從來不知道的事，知道後感到歎息無奈，原來很多發生在我身邊看來很接近的事，我卻懵然不知了很多年；無論如何，有些東西讓我看清是一件好事......好了，還是返回朋友的車，愉快地繼續行程吧!!

之後我地去左另一個西雅圖很特別的地方 - 位於巴刺德(Ballard)區的水閘門，其實概念和運河相似；進到水閘前要先經過這個「英格蘭花園」

這個水閘連接附近的三個水域︰華盛頓湖、聯合湖及普結灣，打通三個水域，方便了海路交通，更解決了洪水問題，而每天當有船要過「馬路」時，閘門就會開放，讓船隻通過，這裡有大閘細閘，讓不同size的船經過，這個打開了的，相信是大閘，給大型船隻經過


但當它不做「閘」的時候，它便是「橋」，還可以有火車經過


另外一些細船，例如這些小遊輪，就在這裡等過「馬路」，等的時候要先調節水位，夠滿先會開閘比船過


小閘門開了，準備過「馬路」，這裡似乎是個頗熱門的景點，兩邊都有唔少人圍觀


這裡原是一個三文魚生長的河道，起了水閘之後，為了不讓三文魚絕後，在堤壩邊緣另闢了一條「魚梯」，留條生路比D三文魚，而這裡亦設有玻璃窗，可以觀看三文魚逆流而上產卵的過程。不過九月，絕對唔係三文魚的活躍季節，所以只是能夠零星落索地看見三文魚經過，而高峰期是八月，據說會好似趁墟咁，大量三文魚峰湧而上，萬魚空巷。而家睇住兩條先啦.....


三文魚是一種頗特別的魚，是條「無間道」，牠們生於淡水，長於海水，最後返回牠們的淡水家鄉產卵後，完成了使命，最後名符其實「精盡魚亡」，他們能夠有機會浸過咸水，再貢獻老家，真的是一個頗完美的一生，難怪牠的肉這樣鮮甜 :P 

在水閘北面，車程五分鐘左右，是一個釣魚勝地，朋友閒時就會在這裡出海釣魚，生活相當愜意。在這裡有些小販擺賣新鮮捉到的三文魚，不過朋友話其實唔係太好食，搵笨的，三文魚其實有四個品種，只有皇帝三文魚才會作食用。

上完一堂地理堂後，又上車去下一站，為左慳時間，我決定skip午餐，朋友駕車去了大學附近買包食，之後我地就去左李小龍墓憑弔一下，這裡叫做「湖景公墓」，不過要找到李小龍的墓地，途中問了一個女人，她竟說「一定o係呢度」架喇，看來她不知道，但說了一些頗廢的話，其實她可以話唔知道。搵左十五分鐘左右，終於找到他們的墓地。

其實並非熱愛功夫，但是李小龍代表著一種香港文化icon，也當然代表著一種不向惡勢力的精神；可是最終他選擇了葬在這裡，而香港除了偶然在電影館同在香港人心中留下足跡之後，竟然找不到容納的地方，連一個紀念館都攪不到，香港人/香港政府不停忽視自己的文化，忽視自己精彩的地方，大家正在攜手步向末路，我無奈，但我冇咩野做得到......但事實上，這個墓園令人感覺詳和，遠處便能看到海景，我能在這裡憑弔，感覺亦相當不錯




我們在這裡逗留了大約十五分鐘，便要離開了，因為朋友有野做，所以先回住所換衫，休息一會，而之後的行程，我會自己一個人遊覽；時間已經到了大約四點半之後，朋友在派克市場(Pike Palace Market)附近放低我，我行落斜路，就可以見到遊客雲集的市場了。

下車後，途經西雅圖的街道


對西雅圖的第一印象，就是全球首間Starbucks就是派克市場對面營業，至今仍棋門如市，雖然我唔「好」咖啡，不過趁下熱鬧都唔錯。我覺得有些奇怪，雖然係全世界第一間jei，但係D野會特別香D咩? 排晒長龍咁，真令人費解....

幾經辛苦潛入店內，看見有人正在採訪


然後就過對面市場逛逛，返到香港，先發現派克廣場甚具對抗資本主義的意味，事關這個廣場原本是農民對抗「大財團」，決定唔經過中間人，直接自己運野來這個市場賣，結果很快就把貨物賣光，農民終於勝了一仗，意義上都幾值得參觀下呢度喎! 這個市場有三個重點，第一個重點就係睇下D蜜糖舖頭，由於冇食lunch好肚餓，見到咩都好想擺落口，更何況係免費試食?


四圍都是蜜糖舖


仲有好多騎呢味的果醬可以試味，例如辣椒果醬、蒜蓉果醬，就咁食都幾好，不過用來夾包食就咪攪......同埋記住一支棍試一次，我差點就做了些不衛生的東西 :P


第二個重點就是參加浮誇海鮮檔，最主要係D店員賣野好似做show，如果賣得成D魚，就會好似雜技表演般將件貨拋來拋去，百發百中，店員突然又會一齊叫口號，好似比賽前咁嗌cheer，不過當然係要有人買野，而且係買D大魚先會有表演睇，所以好難捕捉到佢地「表演」的實況。不過我覺得淨係睇D魚都好精彩，因為條條都好肥美，要明白...我係成個晏晝都冇食過野，呢D就係「望梅止渴」，原來真係work架


最新鮮的三文魚，其實o係美國食三文魚都算平同普遍


好肚餓呀......


所以睇完呢度，都係忍唔住去左附近買左D小食頂肚，搵埋廁所去之後，就搵埋第三個景點 - Gum Wall，但由於這裡不算是正式景點，要問人才知道，我在一間糖果店問老闆娘，她很耐心地告訴我gum wall的地方，好快就搵到喇!

Gum Wall 這裡據說以前是一間戲院，由於戲院老闆完場後要清理那些香口膠令人苦不堪言，於是索性叫觀眾入場之前，將香口膠痴牆，痴下痴下，就變成今日的Gum Wall，如果唔刻意諗佢地係點樣出現，你會發現這些七彩的香口膠充滿藝術感及創意，其實D香口膠都乾晒，咩味都聞唔到，而呢度亦成為一個另類的拍照熱點!!

如果想一睹gum wall風采的話，其實一點也不難，只要一直向市場直走，見到呢隻小金豬之後，沿住牠身後的樓梯，一落去就會見到架喇!!

不過市場大約到五點左右，就會開始打烊，所以睇完gum wall，舖頭都已經關得七七八八，於是去到附近的平台上看海吹風，今天西雅圖天氣清涼，不冷不熱，係最舒服的天氣

因為要等朋友到七點半左右坐車食飯，時間尚早，吹了一會海風之後，就起程前往西雅圖地標 - 太空針塔(Space Needle)，上頂看看西雅圖黃昏及夜景，由派克慢慢行去，二十分鐘之內就到，不過先行一段長命斜。

黃昏的太空針塔，話時話，同溫哥華O個個幾似


太空針塔對面既音樂體驗館，幾有型噃


然後用了US18.90上頂，觀看一下西雅圖全景，上到頂，天氣真係好鬼凍，一路影一路騰騰震


由日落影到夜晚


好多美國的景點，都會在入場時擺個影相counter，有專人同你影相，等你參觀完之後，就可以去counter度買返你之前既相，不過我影完可以唔駛比錢，在禮品廊會有部機可以將張相email返比自己，唔駛錢架! 所以橫掂都係，假D都send返比自己留念!

E埋張相都已經七點半，急急腳搵返朋友架車，今次計埋我有6個人一齊食飯，不過全檯我係最老o個個.....今晚我地去左食川菜，口味都香港差唔多，計食飯，o係美國咁多日其實真係同香港冇分別! 不過無論如何，肚餓的人，吃什麼也是極品

飲飽食醉，今日超勁開心，因為今日的行程，囊括了大部分旅行我喜愛的元素，有景睇、有正野食、有生態野睇、有獨特文化睇(指的是在這個地方先可以見到，其他地方見唔到既野)，有時同人一齊，有時又可以自己一個，今日我係相當滿足!! 不過我發覺今日都去左大部分想去既地方，聽日仲可以去邊呢??

不過太眼訓，還是明天才決定吧!