南韓(八)︰河回之秋

本來買左9:20的車飛，我天真到以為用45分鐘便可以由西面到巴士站，最不想發生的事終於發生，就係攪到8:30左右出門口，真係仲未適應要搭咁多站既地鐵，就算喪跑都攪到9:30先到，但係人地準時開車，邊有可能等你? 我已有了要重新買飛的準備，我買左10:10的班次，好消息的是原來只需多補原本車票20%的車費，而唔需要重新買過，好彩!

今天要去安東，到步打算再轉車到市郊的河回民俗村，河回村的賣點是豐山柳氏600餘年期間代代居住的韓國代表性氏族村落，瓦家與草家(以蘆葦或稻草做為屋頂的家)歷經長久的歲月，仍完整保存下來的地方，而且還有相當有特色的假面表演及博物館，令人相當期待。

既然仲未開車，也就吃些早餐，韓國人很喜歡吃紫菜卷，今次終於有機會試了，一口氣吃了十件，剛剛好，而且很好味，因為裡面都是用豬肉做餡。

 

由於今次已吃飽，已沒有對車站小食有任何期待，朝早拼命的跑，換來差不多整個車程的昏睡，總之我知道12:40就來到安東，用了剛剛好兩個半小時。到步後，又有旅遊counter，由於今次時間很趕，因為想睇假面表演，所以立即找counter職員找巴士站，counter的阿珠媽見言語不通，索性帶我出來搵巴士站，今次真係唔帶唔得，因為個巴士站在對面馬路。

到達安東巴士站


連廁所都有河回假面公仔，肯定冇來錯吧!


今日安東的天氣可以用炎熱來形容，再加上原來要乘坐的46號巴士，班次很疏，差不多一小時一班，而且仲講明可能會遲到，下一間巴士要13:30先到，很擔心會錯過假面表演，但不能因此就坐的士，會好溶，於是行入附近的七仔避暑同hea，結果巴士真係遲到，13:50才來，仲要已經迫滿人，好勉強先迫到上車，我不禁問點解同順天差咁遠? 到底是否想限制遊客入河回村的人數? 否則唔明點解D班次要攪到咁疏?

好彩車程只需要半個鐘，14:20到步後先買飛，而假面表演就在入口附近(不需門票)，假面表演，正名是「別神巫俗遊戲」是免費入場，不設劃位，所以都仲可以睇到一半。假面表演有幾幕，都是諷刺社會、宗教、權貴的腐敗，可惜全部韓文，聽不明，但有些場口還是挺攪笑，而韓國表演都有一個共通點，就是喜歡邀觀眾出來互動，這個表演也不例外，他們要遊客跟著他們看似祭神的動作「印下印下」，幾好笑，雖然全程都聽唔明，但係不失為一個難得一見的文化項目，欣賞他們對文化傳承的堅持!

其實呢個唔係大門，只係入食街的入口，不過去睇假面表演要必經這裡

這個就是假面劇舞台


睇左冇幾耐，就見到「僧人飲少女尿」的一幕，除左攪氣氛之外，好似仲係想諷刺當時的宗教腐敗現象




觀眾互動演出


其後陸續有新角色出場，不過故事內容就唔係好清楚了




最後演員謝幕，原來女角是由男人扮，嚇親......


時間大約到15:00，終於發現原來大多數遊客都係駕車來，而且又係好鬼多日本人，成個河回村似是服務日本客為主，怪不得交通配套咁差，指示亦不太清楚，唔係好搵到個入口，所以入左面具博物館睇下先，博物館係要另外收費，本來張門票幾特別想keep，但最後遺失了。

Q版面具的背景是芙蓉台-河回村的地標，一陣都會去，也成了門票上的圖象


還有印尼的面具舞用的面具


行完一輪，終於見到遊客中心附近有人收飛，入場後看見入村的穿梭巴士，不過係冇巴士站，我係見到一堆人潮等車先跟埋一齊上，如果唔坐穿梭巴士，要行1公里入村，但時間緊迫，打消了行路的念頭，車程大約10分鐘便到。

入村一股秋意寧謐的氣息湧上心頭，因沿路盡是金黃色的銀杏，是我第一次看見的，再加上這村和數百年前的景象沒有變化，極有入左時光隧道的感覺，行行下仲突然見有兩條友身穿古代衣服的臨記行過，更添古意。而河回村的重點，就是渡河過對面的芙蓉台，觀看河回村的全景，要過河就要比買路錢W3000，真係搶錢；到步後，我似乎誤會了指示，竟選了一條極難行的山路上芙蓉台，但時間好短，10分鐘就可上山，時間大約是四時多，所以有少少日落feel，實在太美，遺憾是河水已乾涸，看不到「河回」的感覺。逗留一會後，便循另一條山路落山，這條平坦得多，到山腳時原來是要繞經玉淵精舍才回到起點，所以順遊了玉淵精舍。玉淵精舍是韓國朝鮮年代的政治家柳成龍，退休後建的一個閱讀室，後來資金不足，靠村內的僧侶協助籌款才能建成。

看完河回村全景，已感到很滿足，時間已不早，要盡快過河，行下條村，唔通比左錢真係淨係呢行山咩? 河回村是韓國的一個文化遺產，果然名不虛傳，民居都保留得很濃厚的古味，處處都是影相位，遺憾最終我只能逗留少於一個鐘，因為太陽已差不多落車，有很多地方我也見不到，例如大型鞦韆、韓式蹺蹺板等，可惜已沒有時間了，大約五時半左右就坐返穿梭巴士離開。

楓葉雖然得一棵，但仍然搶眼
 

雖然冇咩楓葉，但係銀杏一樣咁靚


好一片金黃、充滿秋色的河回村，圖中估計是河回村的農民






見到呢兩個人行過，覺得好似行錯左入去時光隧道


這個就是河回村地標 - 芙蓉台，唔上去就好似冇到過河回村


要渡河才可到芙蓉台，這是在芙蓉台那邊望回對岸


唔知呢個牌係咪話唔應該行呢條路上去呢? 不過我都唔建議，除非你想行到爛鞋


從芙蓉台望向河回村，景色一流




乾涸的河水，為整個美景打了些少折扣


落山後行經玉淵精舍




落返山，正式行村，古意再加秋意，河回村實在令人陶醉








這是「養真堂」，是柳氏韓屋中的"top house"


四周都有這些賣面具的手信舖


臨尾再影多左日落的芙蓉台


真係好唔捨得，但係都要走，這是回程的穿梭巴士


趕住走的另一原因，是想試下馳名的安東燉雞，看見河回村外四處都是食店，相信不會找不到，可是同一情況又再出現，就是燉雞是二人份量，一個人唔serve，我又失望而回，真係好無奈，就算我肯比錢都唔一定有得食，唉……而太陽亦已落山，我就乖乖回巴士站等返46號巴士，盡快離開。回到安東巴士站附近，那裡其實比較偏僻，食肆不多，於是就去其中一間較大的搵食，又係手指指的時候，不過驟見那裡大多數都是賣牛肉鍋，相信都唔會有太大問題，我點了個牛肉鍋，一吃之下，不知是否我在吃正宗的安東牛肉(牛肉都好出名)，牛肉味道極為香口鮮甜幼滑，可惜好細塊，味道令人難忘，於是我就安慰自己，吃不到安東燉雞，有機會吃吃「安東牛肉」也不錯! 真的感到驚喜，不過唔算好飽，是旦啦! 其實最緊要準時上到巴士就得，因為仲有差唔多成個星期留在韓國，仲有好多機會。

美味的晚飯

巴士於22:20準時到釜山，在這時有兩名美少女突然送我一張地鐵全日票，我當時不懂反應，即時唔明仲咩有人送野比我，後來想想她們都係用完唔好浪費，給我用盡佢，但這個舉手之勞讓我有些感動，好…我決定如果有機會，我也會把用剩的全日票送比人搭! 晚上坐地鐵時，看見一個奇怪的少女，在車廂睡覺時chok得好勁好誇張，本來心裡覺得好好笑，可是望近一點，發現該少女成手瘀痕，似是被人虐打，被嚇親之餘，感到難以置信，為何少女不去醫院，而係拎住大包細包唔知去邊到? 我在想如果有一個這樣的人在香港，會否有人幫助她?

帶著疑問回旅舍，快快睡覺，準備明日再度釜山遊，不過今晚是最後一天在釜山，明晚便要返首爾，預備旅程的下半部，就是迎接香港來的朋友，一齊再去玩!!

旅遊心得︰
1. 這是從來回河回村的巴士班次，班次相當疏落，真係要好好預時間


2. 這條經過玉淵精舍上芙蓉台的路雖然有少許迂迴，但比較安全舒適，我建議行這條路上山


是日重要消費︰

遲到補巴士差價	W3100
紫菜卷早餐	W3000
安東回釜山巴士票	W15300
46號河回村巴士	W800
河回村門票	W3000
假面博物館門票	W2500
芙蓉台渡河來回	W3000
牛肉鍋晚餐	W7000