韓國(十三)︰藝術在首爾

10月26日

嘩….呢間劏房真係，昨晚去廁所開門時，門柄突然成個甩出來，真係十級驚嚇，連門都開唔到，後來幾經辛苦先塞返個門柄落去，如果全天要在房裡度過。唔通平就要攪成咁?

嚴格來說，今天去的可能是最後一個首爾的行程，唔係特別鍾意藝術，只係好鍾意colorful既野，所以在釜山去完甘川洞，到了首爾仲有一個幾出名的惠化壁畫村我都好想去，早上的行程就是這裡。

惠化站似乎是大學區，所以好似好難搵到食肆，只能找到間小café，食個芝士飽就算，這個不要緊了，因為食左咁多日好野，都心滿意足。食完早餐之後，問問途人便知駱山公園在哪?(但反而問café職員佢地話唔知)，沿途看見一堆少女，拎住一張地圖狀似玩treasure hunt的樣子，我們知道，面前就是我們的指南針。

我們跟隨到駱山公園，就和少女失散，但係原來朋友方向感一流，之後由她帶路行，其實我成日攪唔清楚自己既位置，所以成日都估錯方向。無論如何，有人帶路，我就安份守己跟隨便是了!

話咁快就行左兩個幾鐘，又係趕時間的時候，12:00就返落去惠化區一帶，然後隨意入了一間平民化的餐廳，吃最地道的牛肋骨湯，味道不過不失，但求醫肚。

這是我最愛的壁畫，估不到第一幅就看到

看到這個牌，就知無走錯路了

一路向上，會陸續看見不同的壁畫

公園沿路也有不少有趣的藝術品

眺望惠化區一帶

這個是少女拍照的熱點

看來是最近才有的一幅壁畫

又係花，不過名氣無之前那朵那麼大

這是我另一幅最愛的壁畫，這幅的特色是其實一部分是真實的石牆身，其餘的部分是加插畫上去的

牛骨鍋午飯，吃完雖辣但不口渴

這個壁畫村icon開始被攀藤掩蓋

可愛的便便

這是就近大學區的馬羅尼矣公園，旅遊書都經常出現

點解咁趕呢? 事關下晝就要去井邑，在井邑住一晚，翌日早上便立即趕去內藏山，然後下午再返首爾買手信同食陳玉華一隻雞，而我買了KTX 1340的車票，但我始終貪心，想在有限時間做到最多的事情，可惜事與願違，因為我忽然記得，原來上車站唔係首爾站，而係龍山站，在我仍暗喜自己應該趕得切時，我才發覺我1340是在首爾站，我知道一定趕唔切，因為KTX係好準時，結果我在1345先到龍山站，一切已恨錯難翻。

於是立時補票，我要坐下一架1550班車，好彩亦都唔需要重新買過，又係補返附加費就OK，只可惜要呆等差不多兩個鐘，心有不甘，但亦都無辦法；唯有睇下書，計下開支，或四圍望，等等下又見有幾個韓國人在我附近嗌交，今次應該係拎錯行李的問題，最後原來係一場誤會，點解呢D事我成日都見到既? 和諧和諧……

1550到了，我被分配為free seating，簡單來說就是無編座位，要躲在車卡間的座位，如果車卡座位被人坐左，就要企足全日，好彩我快就搵左個車卡位坐，如果唔係就係喊得一句句；我突然間覺得自己好可憐，又要加錢比貴票，又要無正常位坐，突然覺得自己好折墮，真係以後都唔敢遲到。這次坐KTX的心情，就是好想好想快D落車快D完。

幾快都要差不多三粒鐘先到，到步井邑係1803，我沒有忘記先買回首爾的回程票，天已差不多黑，第一時間先找住宿，我知道今次搵住宿要靠自己，因為遊客中心都關門了，不過我又知道井邑係去內藏山的前哨站，只要有錢的話，搵住宿該不是什麼問題。而在這些小城市找住宿，最好還是選Motel汽車旅館，一落KTX過對面馬路已經有好多。

我心目中的底價是W40000一晚，而我隨機入去不同的motel問，發現離開KTX越遠越平，第一間收W60000，第二間問收W50000，問完兩間之後，終於看到巴士總站，巴士總站後有一楝五層高的大廈，直覺告訴我這是一間motel，於是我行入去問，結果真係W40000有交易，於是立即成交，然後住在那裡頂樓的一間房。不過成間motel陰陰暗暗，成間時鐘酒店咁。

今晚終於可以脫離劏房，但我始終開唔到廁所燈掣，同接待處職員又雞同鴨講，算啦，總比甩門柄小事，同埋只係訓一晚就由得佢。晚上出街醫肚，可選的不多，本來想入去韓式小店，同樣遭遇一人唔serve的待遇，所以唯一可以食的是炸雞，但係相當難食，係十多天來最難食的一餐，而且好貴，不過算啦，都食左咁多日好野。

整晚流流長，有咩攪好呢? 突然諗到可以試下呢度的桑拿，沖下身，可以玩埋汗蒸幕，於是我問人有冇「sauna」，他們說有，可是始終雞同鴨講，我只能向著他們手指指的方向，一步一步地找；我走入一條寂靜的街道，冇咩舖頭開門，得閒又行入D開左門既地方睇下，好多都係motel，終於找到一個油站有職員，她告訴我原來就在油站後一間多層大廈(其實又係motel)，那麼我就終於明晒! 非常好，好快就行到過去，果然真有得焗桑拿，而且唔貴，於是立即比錢幫襯。

上到去，發現這裡不過是一個「浴場」，什麼「汗蒸幕」、「按摩」都欠奉，桑拿、按摩椅倒是存在，所以我可以做的便是沖下身、焗下桑拿、玩下按摩椅等等，玩玩下就一粒鐘多少少，當係消磨下時間；時間大約到九時多，成條街都冇晒人，好彩便利店都有開門，一路飲支香蕉奶，一路行返去。返到去hea下，睇一陣電視，都好眼訓了，早睡早起精神好! 明天希望和楓葉有緣，早抖!

我在井邑的房間

夜晚幫襯的澡堂

旅遊心得︰
1. 在井邑，住宿、食店、交通設施都集中在同一條街上，從KTX站，過對面馬路，行十分鐘左右已經見到巴士總站，我的motel就在巴士站後面的那幢樓，非常易認

巴士站後，就是我住的motel

是日重要消費︰

早餐	W3000
午餐	W6000
KTX差額	W3500
炸雞晚餐	W9000
Motel住宿一晚	W40000
KTX回程	W35000