南韓(九)︰太宗台PK

今天是最後一天留在釜山，時間過得真係快，早上吃早餐遇到一個德國伯伯，他表示為了避寒，打算半年留在東南亞及韓國，愉快的晚年!! 但願我也有這一天! 食完飯打算收衫，看見今天的天色和前幾日唔同左，而且地下濕晒，突然感到不安，莫非今日會落雨? 由於要checkout，所以就算D衫唔算太乾，都要照收。

出街的第一件事，先到地鐵站買全日票，然後就係寄明信片，中央郵局就在中央站(112)九號出口一出就係，五分鐘唔駛就寄好。要省點時間，因為今天的重點就是遊覽太宗台，那裡沒有地鐵到，最方便的就是在釜山站(113)下車，在7號出口再轉巴士，在坐巴士之前先在附近醫肚，時間尚早(雖然已經係十一點多)，舖頭開的不多，好多都好似準備緊，於是求其見到一間似乎開左門既餐廳，兼且門口有好多圖片，方便揀野食，就入左去，我叫左個鐵板牛肉蓋飯，吃完之後感到非常溫暖，遍體生溫，好似冬天食煲仔飯咁。

隨意挑一間在巴士站附近的餐廳，就是這間了

美味的牛肉蓋飯


就在這裡等巴士


巴士88同101號，都是以太宗台為總站，兩間巴士都幾頻密，一陣間就等到架101上車了，由釜山站到太宗台需要一小時車程，要預時間。

到達太宗台已是十二點半左右，今日遊覽的時間其實不多，因為見釜山D野咁平，打算買住部分手信先，而之前又在網上book了7:30的KTX班次，所以又要在7:30前攪掂晒所有野返釜山站。好趕好趕，所以去到幾多得幾多。

太宗台係一個海岸公園，主要集觀景、遊船河、散步於一身的景點，如果全程行路的話，到太宗台遊覽係完全免費。行左一陣看見觀光車的停泊處，我先買支香蕉奶口痕飲下，唔記得已經飲第幾支，幾乎日日都飲，不過細細支都幾貴下；飲完之後，打算先落小碼頭，看看有否遊船河的活動，其實這時天色未算太差，只是風大了點，但碼頭完全水靜河飛，counter都關門，我仍不明所以，唯有以吹風作安慰，然後打算行返上觀光車的售票處買飛，這時已覺得有些不對勁，因為完全冇遊客在車內，豈料原來因天氣問題，觀光車取消運行，當時完全不明白，好像只有少少雨粉，為何要取消，我仲覺得佢地偷懶，於是無奈地搭自己的十一號巴士，由售票處走到母子像瞭望台那邊，總共用了四十五分鐘左右。

一路上遊客都比較少，行得幾舒服，我一口氣走到瞭望台，沒有像其他路人般休息，原來這是個明智的決定；到瞭望台看了一會，其實已大霧到差不多什麼都看不見，於是落去餐廳去廁所，前後才兩三分鐘的時間，再行返上瞭望台時，突然下起大雨，雖未至傾盆大雨，但是那種足以令人濕透的那種，而剛才在路邊休息的遊人，全部都成為落湯雞般跑到這裡避雨，但已經太遲了，心中暗喜，有時命運既野就只差一線，我都明白原來人地唔係偷懶，真係預計會落大雨先停開觀光車的。

太宗台入口

這是紀念韓戰時外國醫療隊的紀念柱


停駛中的觀光小列車


杳無人煙的海邊


寬闊大道

這裡就是瞭望台，原來已開始有些少雨粉

傳聞母子像一出，在這裡跳崖自殺的人大幅減少；對此我相當欣賞，如果係中國的地方咁樣，只會滿天神佛，卻係於事無補，但係利用如此動之以情的設計，既有心思又有功效


慶幸還看到水壺島

可能部機太光了，都唔似落雨，其實當時好大雨

但係我要逗留多久才能動身呢? 時間一分一秒地過去，好彩廿分鐘左右雨變細了，一場來到太宗台，真係唔想咁就走，想最少行埋過去燈塔先返去，於是心有些急，原來行多十五分鐘左右，便看到行落燈塔的樓梯，可能心情很興奮，而且又心急驚再落雨，自負的我，高估了我雙鞋的防滑力，在我跑落樓梯的時候，終於如溜冰一樣，成個「dun」左落地PK了，仲被附間小舖的阿珠媽見到，真係醜怪，腳也拗了一拗，慶幸我骨格精奇，腳是有些痛，但暫時仍能行動自如，我希望能夠捱落去，而我也成功看到了燈塔同真正的太宗台。可是因天氣問題，落太宗台海邊的路封了，不過我也不打算落去，因為驚隻腳有咩事上唔返去，在這裡吹吹海風，也已感到相當滿足，而天氣亦開始有些少改善，最少霧已散去了一點。

PK完後，未看到燈塔，就看到這六位的像，不知是何許人呢? 因為跌完，都冇心機研究了

終於看到影島燈塔，本來可以行埋落去，可惜天氣差，封了


巨型一大塊神仙岩，有些漏網之魚在這裡影相、玩，其實真係好大風


同香港既望夫石真係一模一樣，所以都可以叫佢做望夫石，因為傳說這是等待被迫去日本的丈夫回家的婦人

雨暫時告一段落，之前看不到釜山的對岸，而家睇到了


回程時看到的「救命寺」，有趣的名字


太宗台附近的影島區，呢度好多海鮮餐廳


時間約已二時半左右，要預返多一個鐘左右回程，託賴隻腳仍然健康，就住唔好太急亦完全冇問題，行返巴士站，坐返101號巴士返釜山站，拎定張KTX車飛兼找數，然後就去掃貨。

回到釜山站

原來釜山站對面馬路就係唐人街所在地


第一站先去旅遊書介紹的農協超級市場，這裡就在札嘎其站(110)八號出口一出即到，看看這裡的東西會否便宜一點，同埋要幫家人買一隻農協出品的蔘液，在首爾南大門見不到，在這裡真的找到，就算包裝不同也不緊要吧! 不過因為太大盒，所以我打算去完札嘎其魚市場樓上的乾貨店，看看那裡會否更平，之後再回來吧! 其實嚴格來說，我是到了札嘎其對面的一個類似的市場，我覺得應該會平一些，上去我不停試食，樣樣都好食好想買，最終我還是買了些紫菜同八爪魚乾(好鮮味架!)，再用僅有的韓語講價，用了W16000買了三pack手信! 唔知係咪真係平左呢? 至少我覺得是…….之後我發覺原來附近的街檔也相當熱鬧，所以亦逛左一陣，可惜天雨路滑，我的鞋同腳已濕，行得好唔自在。之後我就再返去農協買蔘液，買完了，時間大約五時多，滿載而歸地回西面，吃飯兼取回行李，然後再搭KTX。

回到西面站，其實一直想睇下有冇燒烤食，可惜有都唔知點解收左，於是我就隨意pick up一間食店坐低食，帶著多次一人唔被serve的陰影，今次終於成功坐下，仲叫左一個豬脾肉定食，好野!!

農協超市是釜山一個買手信不錯的選擇


札嘎其外的小販攤檔


燒魚好吸引，可惜冇時間來吃了，只好留影


時間尚早，一個人食野都唔尷尬


呢個餐又係滿漢全席，豬腳肉碟上黑色的叫黑米腸，味道有點怪，好彩得兩件，都食得晒，其他都清晒，食左咁多餐辣既，今天讓味蕾休息一下，雖然我也忍不住拿一些青椒夾菜食，不過唔係好辣


好景不常，食完野之後，大雨再來臨，今次我真係冇得走避，而且冇帶遮，只靠風褸的帽遮頭，但係手持的手信冇得遮，我唯有加快速度，又要小心唔好再PK，返去hostel拎完行李之後，雨仲未停，但冇辦法，唔想再miss車，硬住手信被雨打的危險衝過去地鐵站，慶幸蔘液是禮盒裝，較為硬淨，但係我又背囊又手抽幾袋野，又要跑，食咩都燃燒晒，完全係體能大考驗，無論如何，我順利在7:30前到達釜山站，安安樂樂地回首爾。只是仍然很疑惑，為何我在某個地方最後一天留低時，總會有雨天來送走我，上次首爾係咁，今次釜山又係咁，今次仲勁過上次。

晚上10:13分毫不差地回到首爾站，嘩，痴線，天氣突然超凍，好似香港寒流襲港那種天氣，我一方面擔心自己唔夠衫，但一方面又暗喜，因為看到楓葉的機會又會較大，不過而家我一心只想快點回到旅舍，快點休息，迎接明天香港來的朋友一齊玩。

早在香港已book了這間Korea Hostel，地點就在新設洞站(126)十一號出口，好想藉此鬧下韓國地鐵，我拎住咁多野，需要坐電梯由地底上地面，但電梯個關門掣形同虛設，基本上入左lift要等半分鐘先會郁，慢到出汁，但我實在太辛苦了，要等到都冇辦法，這點香港要先進得多了! 出左站之後，問過下人，原來一點都唔遠，同埋唔駛上斜路，要找的地方就在眼前。看見外表新淨的旅舍，突然覺得好似返鄉下一樣咁溫暖，最溫暖的是有兩個職員，其中一個竟是香港人，所以全程可以用廣東話溝通，另一個講國語的也很nice，只是時間很晚，我冇咩心情同人吹水，一心只想盡快沖涼就寢，所以都唔知點解會有個香港人o係度做，但見到佢地個留名冊，原來都有唔少香港人O係度住。

雖然服務良好，但係房間size就認真嚇人，真係一個不折不扣的劏房，張床細到驚會跌落床；可是而家只能適應，心裡只嘆一句，真係越住越窮，心裡懷念著初到首爾時住在柳先生的家……冇辦法，鬼叫你窮，要慳錢，唉....

劏房style，圖中可見千里迢迢從釜山帶來，弄濕了的蔘液一盒

就這樣完結先甜後苦的一天!

旅遊心得︰

1. 到太宗台可在釜山站7號出口出，向前行五分鐘便會找到巴士站


2. 遊覽太宗台，正如旅遊書話齋，要預留半天來回

3. 原來十月尾韓國會下大雨，落完雨就會凍，經常轉天氣，身體弱的記得多穿衣!

是日重要消費︰

寄明信片	W740
午餐︰牛肉蓋飯	W6000
101巴士	W2200
蔘液一盒	W60000
KTX返首爾	W55300
晚餐︰豬腳餐	W8000
首爾hostel x 5晚	W145000