南韓(十一)︰韓宮行II

至今只遊了一個景福宮，所以今天會揀昌德宮、秘苑及昌慶宮去埋佢。

我和朋友直接在安國站(328)3號出口等，求其選了一間舖頭食早餐，又叫了紫菜卷吃，想講韓國的紫菜卷好似香港的栥飯，但係我鍾意紫菜卷，一來可能九點幾先食早餐比較有胃口，二來味道適中，唔會太膩亦唔會有味精。儲夠energy，便向著昌德宮走了。

昌德宮和景福宮都做過朝鮮皇帝的住所，景福宮被破壞時，就用昌德宮；昌德宮被倭寇破壞時，又搬返去景福宮，但最終仍以景福宮為主。據聞昌德宮是完全按照自然地形而設計的，雖然沒有細心研究有幾按照自然地形，不過比景福宮人少是事實，其他設計則看不出和景福宮有多大的分別；我們就在主座行了一會，由於之前在網上預約了12:30才遊秘苑，而主座一陣就行晒，於是我們就去昌慶宮行一陣；點解會揀去昌慶宮，因為從昌德宮入昌慶宮以及秘苑，都係同一個門口入。

昌德宮正門-敦化門

錦川橋一角


昌德宮正殿 - 仁政殿，皇帝登機、大臣行禮等重要儀式的地方




皇帝的龍椅


最得意係見到天花板有西洋燈


宣政殿 - 昌德宮的「行政大樓」


後宮妃子生活之地 - 大造殿


「昌慶宮是朝鮮第九代國王成宗於1483年(1484年完工)在昌德宮東側修建的宮殿。和昌慶宮沒有城界，當作一個宮殿使用。」摘自昌慶宮大門口的小冊子首頁，昌慶宮的名氣沒昌德宮那麼大，因它多作輔助昌德宮的用途，1907年，日本佔領韓國期間，昌慶宮的大部分建築拆除，建了個動植物公園，並對外開放直至1983年，之前搬走動植物公園，就把昌慶宮回復原貌。這裡最大的賣點，就是朋友在這裡找到免費任添的咖啡，同埋看到一班在玩「狐狸先生幾多點」的小朋友。

昌慶宮，明顯人氣稍遜，但換來寧靜

還是活潑的小朋友最引起我們的注意，完全是港式「狐狸先生幾多點」的玩法，要「斬手」架


瘋癲一刻


大約十二時半，我們再回去秘苑的門口入場，一直都以為要有導賞先入得，又以為要另外收費，原來唔駛另外收費，又唔一定要導賞先入得，因為完全冇關卡去check你有冇book到，我book的應是中文導賞的時間。其實我們最主要都係想入去影相，導賞與否沒有太大問題。

昌德宮秘苑在當時是不許皇室以外的人進入，所以又叫「禁苑」，這裡是國王休息散步的地方，也是吹水、考科舉、玩的地方，有時候也會在這裡舉辦妃子的大型宴會和為宗親大臣的宴會等；而我則期待在這裡看到漫天楓葉，可惜結果有些少失望，不是不見到楓樹，但唔係漫天果隻，所以整體來說，整個秘苑就似行緊一個好大的嶺南之風公園，再加上開始肚餓，最後跟隨導賞，便從另一邊出口回昌德宮離開了。

終於到秘苑，秘苑的中心，芙蓉池和宙合樓，不過只可遠觀，不得內進

遠看映花台


楓樹的集中地 - 金馬門，不過其實得幾棵，好過無啦






尊德亭，是秘苑最遲修建的地方


離開時看到一棵老樹盤根


究竟仲有咩好食呢? 隨機看見剛才吃早餐的地方附近，有一間食粥的舖頭，其實韓國食粥都出名喎，而且時間幾晏下(成三點幾)，夜晚朋友又打算食「宮廷宴」，我覺得唔食得咁heavy都ok，試完之後果然冇試錯，粥味幼滑，味道鮮甜卻又沒有味精，特別係吞拿魚碎粥，原來呢個粥+吞拿魚碎係有一個咁奇妙的chemical effect!!

我們就隨意入了這間粥舖食粥

一碗好明顯係吞拿魚粥，另一碗係鮑魚粥，我選了最少鮑魚的一碗，這裡的鮑魚粥是分三級的，所以這個鮑魚粥可能太少鮑魚，所以味道唔算好甜


韓屋村之交差照


在趕急的情況下，在安國站看到別緻的瓷磚畫


行完兩個宮，本來會先上北村韓屋區影下相，然後再到仁寺洞地區去一間叫「山村」的地方食宮廷宴，但我自己想晚上看JUMP，朋友則打算行街，所以我決定到北村影一兩張必影相後，便先回明洞的遊客中心買JUMP的票，要既然一場返到明洞，我亦肩負幫自己同幫大家換錢的任務，因為想返去第一天發現那間匯率比較好的樓上舖換錢，然後再返仁寺洞join朋友食飯，再速速趕去睇JUMP。

時間真係好趕，其實只有大約一小時從昌德宮行去北村，並返到去地鐵站，找路過程尚算順利，總之在最後一刻，找到熱門的影相點，不過八景就無法慢慢找了，好趕急回地鐵站，坐車返明洞。第一件事就是先換錢，美金的匯率和其他沒有分別，但港幣就真係好D，可以換到1:141.5(一般都是1:140)；之後就返去遊客中心訂JUMP的門票，好彩仲有位。攪完一輪，不知不覺已是五點半，趕快坐地鐵過幾個站的安國站到仁寺洞，我再重覆一次，首爾的地鐵真的好X煩，雖然只係幾個站，但係轉線的過程極煩極遠，救命。之前約了朋友在間餐廳對出的路口集合，誰知我行錯路，越行越遠，攪左好耐先搵返條正路，本來約左6:00等都攪到成6:20先到，都唔知係個地圖誤導定發雞盲?

我們走入小巷，找到了「山村」這個舖頭，間舖頭的設計似一座華麗的佛堂，一睇Menu，所謂的盛宴全部都是齋，大約有20道菜，但係按人頭收費W59000一位，同朋友之前找的資料有極大的出入，所以我們決定唔幫襯，偷偷地著返鞋便閃，我覺得都係一件好事，因為唔駛食齋…hehe，我地出返小巷，正在盤算食咩既時間，見到對面有間食麵的舖頭，由於時間有限，感覺那間舖頭似食快餐，於是就轉移陣地，而這間舖頭也竟然比到我驚喜喎! 店員建議我們食一個雜菜鍋加餃子，會夠我地三個人食，最終時間關係，也就跟隨店員的決定，而這一餐也是走清淡健康路線，我覺得唔錯喎，因為有些似久違了的任食邊爐的感覺，不過今次全煲都係菜，餃子的味道也不錯，而且唔算辣，湯底味濃卻沒有味精，所以今餐我都好滿足。話咁快就食完，兼夾埋明天的行程，食完之後，我和朋友就分道揚鑣。

臨離開明洞，整返支美味的燒雞串先，份量都幾大下

仁寺洞 - 紀念品中心




我們就在這間麵店食晚飯




淡淡而美味的雜菜鍋及餃子


我book左8點鐘的場次，但始終都要7:30先食完，半個鐘，由安國到鐘路三街(329)，雖然只隔一個站，但係上上落落，其實好花時間，再加上原來仁寺洞係買工藝品手信的熱點，所以一邊行一邊忍不住要看，始終想買些手信，可惜太急，都係得個睇字，耽誤了少許時間。根據旅遊中心拿的單張，JUMP劇場在14號出口，出左之後，我不肯定自己的方向，總之就是看不到JUMP劇場，拿著單張問人路竟然多次被人拒絕，莫非佢以為我派傳單? 好失望，又浪費左幾分鐘，最後先發覺原來一出站要向後行。雖然終於見到，但係因為冇門券，保安叫我照上去，問題就是JUMP正在演出時，唔知點解會見唔到個box office(因為nanta、貞洞都會好清楚有個售票處)，只看到劇場收票的姐姐，我同佢雞同鴨講，話我冇票，之後佢又再搵個識英文的職員來，叫我又上又落，我都係唔知去邊度換飛，最終佢地比我入場，但最後足足遲左25分鐘先入場，真係好煩，點解唔會有一個正正經經既box office被人拎飛既??

JUMP係一套揉合跆拳道及功夫的攪笑show，性質和Nanta相似，不過名氣始終冇Nanta咁勁，唔知點解呢? 我個人覺得都幾得意同幾精彩，但完左之後聽到有些講廣東話的遊客，面帶不屑地批評話呢個show唔值呢個價錢，其實我覺得唔駛去得咁盡，但我相信可能這些功夫表演，在大陸可能會做得更pro更高難度，我去得大陸少，所以我覺得表演方面都唔錯，平一點會更好。但這個JUMP的安排實在有很大的改善空間，最後一如以往，係觀眾同演員簽名的環節，問題係觀眾手上根本唔知有咩可以簽，都冇場刊，又唔知點樣買海報來簽，造成成堆演員坐冷板櫈的尷尬場面，其實仲咩要簽名? 比一個corner影相咪算? 這個安排真係相當奇怪。而完場之後，我先發現JUMP係有box office，但係唔明點解我上唔到去，要在地下戲院的box office拎飛，總之成件事一個事講晒 – 亂!!!

唉! 算啦，今日都行左好多路，又無咩精神嬲，明天的行程將會去首爾熱點-南怡島!! 繼續期待滿園楓葉的美景!



Show後演員簽名

這間JUMP就attach在這間戲院裡

旅遊心得︰
1. 記住昌德宮是星期一休息，景福宮是星期二休息，如果想串遊兩宮，就唔好揀一、二喇!

2. 雖然原來唔駛book都可以入場，而且W10000的套票係可以用來遊秘苑，不過我始終覺得book左安全D，上網book好方便，只需留名留護照號碼，之後記住個參考編號就得。不過中文團每天只有一團。

是日重要消費︰

紫菜卷早餐(3人)	W5000
粥餐lunch(兩碗粥)	W17500
晚餐(3人)	W33100
JUMP門券	W40000