南韓(一)︰輕鬆上路

10月14日

終於不需要再為上飛機而要凌晨起身，我還可以吃個big breakfast，慢慢執好野出發，突然想起上一次旅程和今次的旅程的日期是一模一樣，都是14/10至28/10，10月 – 絕對是我的旅遊旺季。

到達機場，第一件事就是找check-in櫃檯，直覺告訴我，這些廉航的check-in櫃檯應該不會在一號客運大樓，果然冇錯，於是迅速過對面二號客運check-in。

印象中這是我第一次親自上網自訂機票，這個第一次我給了濟州航空，上網價才只用了$2500多，平過搵agent，而且時間不算太差，我對不太差的定義不是早機去晚機返的那種，反而下午這個時間對我比較好，真係唔想拖著疲乏的身軀仲要四圍撲，返工仲撲唔夠? 我在學習旅行就是放假休息的道理。

飛機準時於1335出發，廉航的飛機餐當然不能太高要求，所以亦只是一些蛋糕做下午茶，相我都懶得影，事關我覺得韓國大把野食，不需在乎這一時三刻。大約4小時，即韓國時間1835準時到步，又挑戰一個新國家，心情難免興奮，今天肚裡除了早餐及糕點外，便空空如也，不過要先處理行政事宜︰換錢、醫肚同聯絡屋主。

仁川機場

什麼屋主? 其實韓國官方網站裡，是可以安排家庭住宿的，即係住在別人的家中猶如住酒店咁，我大約於九月初已預約了，稍後再講下有關詳情；雖然我有帶電話，但咁快就用會好乸利，還是要用機場電話，對方以英語教導我乘機場巴士到一個叫Sosa的地方下車，然後轉的士，這和官方網頁教導的方法不同，但因為冇咁多散銀，只好跟隨他的方法乘車，人生路不熟，第一次到韓國便要找個陌生地方，慶幸韓國觀光公社出版的免費小書有一詳細的中韓對照的地鐵圖，知道要去的地方叫「素砂」，雖然知道個中文名未必有好大幫助，但係感覺好像踏實一點，最少知道自己去緊邊度，同埋韓國地方名的音好似中文，唔識的話講中文都可以當韓文用。於是就立即買巴士票，然後到肯德基醫肚，這裡一個普通餐都成8000W(約60元港幣)，真係肉痛。

要買機場巴士相當方便，在入境大堂好快就搵到

素砂地區屬市郊地區，所以巴士唔密，食完野都要等到2040左右先有車坐，不過好彩巴士相當準時，而且極之舒服，誰知坐了約半小時後，司機把車停下，似乎不打算駛到總站，他幫我截另一架巴士，這架才到素砂站，這架巴士和普通巴士無分別，座位都很窄，下車異常狼狽。

我要坐的巴士是在7B站頭的7001巴士

攪左一輪，終於到了這個叫「素砂」的地方，我就先了對面的七仔求救

下車到達了一個全是外星語的地方，我應何去何從?慶幸是看到熟悉的七仔，但裡面冇電話，店員又唔明我講咩，於是我硬著頭皮，試用自己的Samsung打比屋主，我一向旅行都唔會用電話，所以真係唔知用唔用到? 不過我忘記Samsung是韓國品牌，要打一個韓國電話又豈會難到它? 屋主迅速的接通，但他叫我先截的士，截到的士再call他，於是我截了架的士，雞同鴨講完一輪後，對方拒載，我無奈要再截第二架，這次司機終於肯載，可憐我背著沉甸甸多返折騰，不斷自問我到了什麼鬼地方?

 這個司機雖然肯載，但都唔熟路，左兜右兜，最後沿路終於見到屋主，時間已是十點半左右，所以我由落機到這裡，足足用了差不多四小時，但無論如何我終於有地方落腳，屋主住在一個中產屋苑，他和太太及3歲兒子同住，我間房睇落幾舒服，然後屋主再帶我行去地鐵站，這裡距離溫水站(145)只有十分鐘步程，我心想，為何屋主唔教我搭地鐵??不過我估計他是不想我行上行落地鐵站咁辛苦，但係其實可能會仲快到。

一邊行和屋主初步認識，他叫Yu Jae Mu(柳在茂)，曾是會計師，現職地產，他以前在上海讀中文，但他中英文都流利，而我發覺我英文竟然流利過普通話，所以之後我都係同佢講英文，今晚時間比較夜，沒有太多時間詳談，但他表示可以一起吃晚飯，於是我就選星期三和他們吃飯，事關我這幾晚都有行程，但又不想錯過和韓國人吃飯的機會。晚上剩餘的時間都是上網同What’s app，這裡可以看到繁體中文，勁方便，真係好似冇離開過香港咁。

預告一下這幾天的行程，明天星期一行程未定，相信要先到遊客中心流連同到明洞換錢，再睇下睇唔睇到Nanta Show，星期二就已預先book左DMZ板門店團，星期三上午就已預先book左到青瓦台，所以亦會連隨看景福宮，往後的行程就要保持彈性。第一天行程就在折騰中完結，慶幸有高床暖枕。

不錯的房間，一個人訓雙人床，抵到爛，不過後來發現原本係冇呢張床的，我亦唔係book呢間房，但都無所謂，舒服就得

旅遊貼士︰

1. 我是在以下網站中，找到屋主資料的︰http://chinese.visitkorea.or.kr/chs/AC/AC_CHG_4_6.jsp#

現在的屋主我是隨機找的，不過當然隨機得來也有些條件，如我想找男性(費時同男女同處一屋有咩誤會就唔好)、平(W40000算是max)、地點不拘(後來發覺都頗重要)，另外我也盡量想找一些有人去過，評價OK的，於是就找了這個，因這裡收W40000一晚，算是比較平，遲些再比較下家庭住宿同自己找旅舍的分別

2. 換錢的匯率，我是韓元除141來換算港幣，機場的匯率差到得137，不值一提

是日重要消費︰

機場巴士7001	W8000
坐的士	W8000
肯德基晚餐	W8300